Stacioni Policor në Gjakovë, me autorizim të Prokurorit të Shtetit, ka kërkuar bashkëpunimin e qytetarëve për identifikimin dhe lokalizimin e një personi të dyshuar për veprën penale “Shpërdorim i pasurisë”.
Sipas njoftimit, në kuadër të hetimeve dhe me autorizim të prokurorit, është publikuar edhe video-incizimi i personit të dyshuar, i cili dyshohet se më 16.09.2025 ka përvetësuar në mënyrë të kundërligjshme një shumë parash nga një bankomat.
Policia e Kosovës u ka bërë thirrje qytetarëve që posedojnë informacione të kontaktojnë përmes numrit emergjent 192, aplikacionit “Lajmëro Policinë” ose të paraqiten në stacionin më të afërt policor
Në kërkesë është theksuar se të gjitha informacionet do të trajtohen me konfidencialitet të plotë.
“Drejtoria Rajonale e Policisë në Gjakovë falënderon qytetarët për bashkëpunimin dhe kontributin e tyre në zbardhjen e rasteve dhe në ruajtjen e rendit dhe sigurisë publike”, theksohet në fund të njoftimit./teve1.info/
