Policia e Kosovës ka apeluar te të gjithë qytetarët që të vozisin me kujdes në kushtet me shi, për të garantuar sigurinë e tyre dhe të pjesëmarrësve të tjerë në trafik.
Në njoftim theksohet se shoferët duhet të kenë parasysh disa këshilla thelbësore për ngasje të sigurt në shi:
“Mbani dritat e ndezura – ato rrisin dukshmërinë për ju dhe për të tjerët në rrugë.
Zvogëloni shpejtësinë – rruga e lagur kërkon distancë më të gjatë frenimi.
Shmangni shpërqendrimet – mos përdorni telefonin dhe përqendrohuni vetëm te rruga.
Mbani distancë mes mjeteve – mos i qëndroni shumë afër automjetit para jush për të shmangur aksidentet”.
Policia rikujton se edhe në kushte me shi nuk duhet të neglizhohet kujdesi në trafik, pasi çdo pakujdesi mund të sjellë pasoja.
Për çfarëdo nevoje, qytetarët mund të kontaktojnë Policinë e Kosovës në numrat: 192 ose 038 550 999. /teve1.info/
