Policia e Kosovës ka vazhduar hetimet lidhur me vrasjen e rëndë që ka ndodhur më 3 gusht në Lipjan.
Përmes raportit ditor është bërë e ditur se tashmë në bazë të urdhëresës së Gjykatës është kryer bastisje në shtëpinë e të dyshuarit.
Gjatë bastisjes, njësitet policore kanë gjetur dhe sekuestruar pushkë gjysmë automatike.
“Pas hetimeve te vazhdueshme lidhur me rastin, më 03.09.2025 bazuar në urdhëresën e gjykatës është kryer bastisje në shtëpinë e të dyshuarit ku është gjetur dhe sekuestruar një pushkë gjysmë automatike”, thuhet në njoftim.
Ndërkohë, të dyshuarit kryesor për vrasjen e rëndë të Enver Bajraktarit, Top Kolshit, Gjykata Themelore në Prishtinë i ka caktuar 1 muaj paraburgim, derisa dyshohet se rasti ka ndodhur për shkak të një mosmarrëveshjeje paraprake.
Sipas gjykatës T.K bashkë me persona të tjerë që deri tani nuk janë identifikuar e kanë vrarë në mënyrë dinake dhe mizore.
Nga ajo çfarë ka bërë të ditur Prokuroria, Bajraktari fillimisht goditet me mjete të forta në kokë dhe trup, më pas ngulfatet e më pas trupi i tij tërhiqet zvarrë për disa metra dhe groposet.
Pas mbajtjes së seancës dëgjimore, gjyqtari i procedurës paraprake vlerësoj se caktimi i masës së paraburgimit në këtë çështje penale është masë adekuate në këtë fazë të procedurës, dhe se çdo masë tjetër do të ishte e pamjaftueshme për zbatimin e suksesshëm të procedurës penale./teve1.info/
