Zyrtari policor në Njësinë për Ndërhyrje të Shpejtë, Alban Rashiti këtë të hënë (9 qershor) ka filluar dëshminë e tij në gjykimin për sulmin terrorist në Banjskë të Zveçanit, ku mbeti i vrarë rreshteri i Policisë së Kosovës, Afrim Bunjaku, në shtator të vitit 2023 .
Rashiti ka treguar se në momentin e sulmit ka pasur shpërthim shumë të madh si dhe tym e zjarr gjithandej për të cilin nuk kanë ditur nga ka ardhur.
Ai ka thënë se nga ky sulm ka mbetur i plagosur në krahun e majtë, ndërsa rreshteri Bunjaku i vdekur.
“E kujtoj që rreshteri Bunjaku ka ardhur tek une, jemi përshendetur dhe jemi konsultuar mes vete që të shpërndahemi dhe të jemi të gatshëm për cdo gjë, pasi mund të jetë e rrezikshme për ne. Ndriçimi në atë udhëkryq nuk ka qenë i zakonshëm si ditëve të tjera, pasi andej kemi kaluar cdo ditë. Ndricimi ka qenë më i madh se në ditët e tjera. Nuk ka pasë asnjë lëvizje në fshat, gje që ka qenë e pazakontë. Kam kërkuar prej kolegut në veturë me shiku me dylbi, nëse mund të shikojë ndonjë gjë të dyshimtë. Duke u shpërnda, une kam vazhduar djathtas, e në ato momente qetësie, pa lëvizje, pasi jam larguar nga ai 3-4 metra, në atë moment ka ndodhur një shpërthim të papritur. Aty kam kuptuar qe jam plagosur ne krahun e majtë. Shpërthim shumë i madh. Shpërthim thuajse në mesin tonë. Nuk e kemi dit se nga ka ardhur. Kam pas zjarr e tym të zi dhe e kam kuptu që jam i goditur në krahë. Kam tentu me kalu në pozitë mbrojtëse, afër një kamionetë, atëherë ka ndodhë një shpërhtim tjetër, sa që ajri më ka përplasur, aq afër kam qenë. Pas disa sekondave kanë fillu gjuajtjet me armë zjarri. Kur kanë fillu gjuajtjet, e kemi pa që po vijne nga i tëri fshati. Nga dhjetëra pozicione ka pasur gjuajtje me kalibra e arme të ndryshme. Në ato momente, posa e kemi lokalizuar se nga po vijne zjarret, kemi fillu me i kthy gjuajtjet. Në ato momente e kam pa qe rreshteri ka mbetur i shtrirë në shpinë, i gjakosur në qafë dhe i palëvizshëm”, ka deklaruar Rashiti.
