Zyrtari policor në Njësinë për Ndërhyrje të Shpejtë, Alban Rashiti këtë të hënë (9 qershor) ka filluar dëshminë e tij në gjykimin për sulmin terrorist në Banjskë të Zveçanit në shtator të vitit 2023 .
Rashiti ka dhënë detaje sesi ka ndodhur sulmi në Banjskë ku vetë ka mbetur i plagosur në krahun e majtë, ndërsa rreshteri i Policisë, Afrim Bunjaku i vdekur.
Ai ndër të tjera ka thënë se ka pasur gjuajtje me kalibra e armë të ndryshme nga dhjetëra pozicione.
“E kujtoj që rreshteri Bunjaku ka ardhur tek unë, jemi përshendetur dhe jemi konsultuar mes vete që të shpërndahemi dhe të jemi të gatshëm për çdo gjë, pasi mund të jetë e rrezikshme për ne. Ndriçimi në atë udhëkryq nuk ka qenë i zakonshëm si ditëve të tjera, pasi andej kemi kaluar çdo ditë. Ndriçimi ka qenë më i madh se në ditët e tjera. Nuk ka pas asnjë lëvizje në fshat, gjë që ka qenë e pazakontë. Kam kërkuar prej kolegut në veturë me shiku me dylbi, nëse mund të shikoj ndonjë gjë të dyshimtë. Duke u shpërnda, unë kam vazhduar djathtas, e në ato momente qetësie, pa lëvizje, pasi jam larguar nga ai 3-4 metra, në atë moment ka ndodhur një shpërthim i papritur. Aty kam kuptuar qe jam plagosur ne krahun e majtë. Shpërthim shumë i madh. Shpërthim thuajse në mesin tonë. Nuk e kemi dit se nga ka ardhur. Kam pas zjarr e tym të zi dhe e kam kuptu që jam i goditur në krahë. Kam tentu me kalu në pozitë mbrojtëse, afër një kamionete, atëherë ka ndodhë një shpërthim tjetër, sa që ajri më ka përplasur, aq afër kam qenë. Pas disa sekondave kanë fillu gjuajtjet me armë zjarri. Kur kanë fillu gjuajtjet, e kemi pa që po vijnë nga i tëri fshati. Nga dhjetëra pozicione ka pasur gjuajtje me kalibra e arme të ndryshme. Në ato momente, posa e kemi lokalizuar se nga po vijnë zjarret, kemi fillu me i kthy gjuajtjet. Në ato momente e kam pa që rreshteri ka mbetur i shtrirë në shpinë, i gjakosur në qafë dhe i palëvizshëm”, ka deklaruar Rashiti.
