Me lot në sy dhe emocione e përqafoi të birin e saj.
I gjithë ky emocion është pasi djali i saj, nga kjo e premte do ta bartë uniformën e Policisë së Kosovës.
E zyrtari më i ri tha për Tëvë1 se uniformën e policisë do t’a bartë deri në pensionim.
“Bashkë me familjen tem të mrekullueshme ia kam dalë, ishalla don Zoti secili, çdo i ri e re, e përjeton këtë emocion këtë uniformë, sepse uniforma është shumë e shenjtë. Tre muajshin që kemi studiu dhe mësuar, kemi ushtru po besoj që do të dal faqebardhë ishalla deri në pensionim”, tha zyrtari policor.
E nëna e tij ka disa fjalë për të birin.
“Sot vetëm kam qajtë, se vetëm këtë djalë e kom, tash ka me qenë për popullin”, tha nëna e policit.
Ndërsa zyrtari policor i gjeneratës 61-të, Deniz Hajrullahu që i takon komunitetit turk, tha se do t’i shërbejë të gjithë qytetarëve pa dallim.
“Ndihem shumë i lumtur që t’i shërbej të gjithë qytetarëve të Republikës së Kosovës, pa dallim etnie, feje apo religjioni apo edhe ngjyre. Njëkohësisht jam i komunitetit turk, vi nga një komunitet pakicë në Kosovë dmth ndihem shumë krenarë, jam krenar me i shërby të gjithë qytetarëve dhe territorit të Republikës së Kosovës”, tha Hajrullahu.
Kolegu i tij thotë se policia e Kosovës është familje e madhe për çka ai u shpreh krenar që u bë pjesë e saj.
“Çdo konkurs e kam ndjekur që t’i bashkohem Policisë së Kosovës. Policia e Kosovës është familje e madhe, për mua është nder dhe privilegj t’i shërbejë atdheut dhe qytetarëve të mi”, tha zyrtari policor.
Në mesin e të diplomuarve, janë edhe komuniteti serb, ashkalinj, egjiptian, boshnjak e turk. /teve1.info/
