Një nga një, iu drejtuan drejt Kompleksit Memorial të Dëshmorëve në Penuhë.
Kështu këtë të premte, në 27-vjetorin e çlirimit të Podujevës, veteranë, familjarë dhe përfaqësues institucionesh nderuan të rënët që sakrifikuan për liri.
Për bashkëluftëtarët, kjo mbetet një ditë krenarie.
“Kjo është një ndjesi e veçantë. Po kujtojmë… në 27 vjetorin, domethënë ditën e çlirimit, e kujtoj momentin kur jemi hyrë në qytetin e Podujevës edhe jam shumë krenar që isha pjesë e luftës. Ne si veteranë keqësohemi gjithmonë për çlirimin e vendit, për të ardhmen e rinisë, edhe lavdia më e madhe iu takon dëshmorëve. Ata na mungojnë sot, po kemi emocione për shkak të mungesës së tyre, po prapëseprapë jemi krenarë kur i shohim rininë, shohim gjallërim. Këtu jemi në vendin ku i kam shumicën e shokëve edhe ndihem pak i shqetësuar, po lavdia iu takon atyre”, tha veterani, Florim Statovci.
I pranishëm ishte edhe ish-komandanti në UÇK, Kadri Kastrati, që kujtoi ditët e fundit të luftës.
“Dëshmorët janë ata që janë më meritorët që ne sot e gëzojmë këtë ditë të çlirimit, ditën e fundit të çlirimit të Kosovës sepse forcat serbe në atë kohë, unë kam qenë këtu duke komanduar me forcat ushtarake të Ushtrisë Çlirimtare të Kosovës, janë të fundit që kanë dalë nga Kosova. Është një emocion i jashtëzakonshëm edhe për mua personalisht sepse e kujtoj para 27 ditëve kur ne kemi dalë nga një luftë tmerrshme, një luftë ku Ushtria Çlirimtare e Kosovës ka kryer misionin e vet, dhe duke i falënderuar forcat e NATO-s që iu kanë bashkëngjitur, iu kanë qasur Ushtrisë Çlirimtare të Kosovës për çlirim, na kanë ndihmuar dhe ne për gjithmonë i kemi larguar armikut nga këtu trevat Kosovës”, tha komandanti Daja, Kadri Kastrati.
E sakrificën e të rënëve e ngriu lartë edhe i pari i komunës së Podujevës, Shpejtim Bulliqi.
“Është një prej ditëve me të vecanta për vendin tone, pasi falë gjakut të deshmorëve dhe gjithë sakrifices së këtyre që luftuan por edhe miqëve që na ndihmuan, lavdi për gjithë këta dhe faleminderit gjithë atyre që na ndihmuan në momentet më të vështira për popullin e Kosovës”, tha ai.
Dita e Çlirimit, për ish të burgosurin politik, Isak Shabani, tash kryetar i Kuvendit Komunal, mbetet ndër ditët më të rëndësishme të Podujevës.
“Në 19 qershori, dita e çlirimit të Podujevës është një ndër ditët më krenare që e festojnë qytetarët e komunës sonë. Ndryshe, dita e çlirimit është duke falënderuar dëshmorët e kombit, invalidët të cilët kanë dhënë gjymtyrët, po edhe veteranët e Ushtrisë Çlirimtare janë më të merituarit që sot e gëzojmë këtë liri. Prandaj, këtë liri duhet ta ruajmë si sytë e ballit”, tha Shabani.
Komuna ka realizuar disa aktivitete për ditën e Çlirimit të Podujevës.
