Ministria e Bujqësisë, Pylltarisë dhe Zhvillimit Rural, përmes Agjencisë për Zhvillimin e Bujqësisë (AZhB), po vazhdon me ekzekutimin e pagesave direkte për fermerët përfitues në kuadër të programit të subvencionimit.
Sipas njoftimit të ministrisë, deri më tani pagesat janë realizuar për fermerët në sektorë të ndryshëm, si dhe për bizneset përfituese.
Në sektorin e blegtorisë, pagesat kanë përfshirë 1 mijë e 712 fermerë, në vlerë prej 1 milion e 266 mijë e 330 eurosh.
Ndërkaq, për sipërfaqet bujqësore janë ekzekutuar pagesa për 10 mijë e 973 fermerë, në vlerë të përgjithshme prej 14 milionë e 438 mijë e 34 euro e 26 centë.
Pagesa janë realizuar edhe për 294 biznese, me vlerë prej 1 milion e 289 mijë e 50 euro e 36 centë.
Në total, shuma e pagesave të ekzekutuara arrin në 16 milionë e 993 mijë e 414 euro e 62 centë.
Agjencia për Zhvillimin e Bujqësisë ka bërë të ditur se po vazhdon punën për realizimin e pagesave të tjera të parapara në kuadër të këtij procesi. Sipas njoftimit, për subvencionim kanë aplikuar gjithsej 33 mijë e 460 fermerë.
Ministria dhe AZhB-ja kanë ritheksuar përkushtimin për përmbushjen e obligimeve ndaj përfituesve dhe për mbështetjen e vazhdueshme të sektorit të bujqësisë në Kosovë.
