Ditët kanë filluar numërimin mbrapsht.
Vetëm edhe pesë ditë, mandatari i dytë i Vetëvendosjes, Glauk Konjufca ka kohë për formimin e Qeverisë.
Por nga ky subjekt thonë se nuk kanë ftesa zyrtare për partitë politike përveç thirrjes publike për ta.
Në këtë parti kanë thënë që urojnë që partitë tjera të reflektojnë duke e votuar “Qeverinë Konjufca” derisa kanë nënvizuar se seanca për votimin e qeverisë do të thirret brenda afatit kushtetues.
“Në mbledhjen e fundit të Këshillit të Përgjithshëm ne propozuam dhe nominuam mandatarin e dytë për Kryeministër, z. Glauk Konjufca. Me këtë rast ne po ashtu ritheksuam dy gjëra: kalimin e sfidave dhe çështjeve që kemi përpara si buxheti i vendit, buxheti për RTK-në, buxheti i tre komunave dhe pakoja e BE-së; dhe, në anën tjetër, edhe shmangien e dy palë zgjedhjeve. Kësisoj, ne u bëjmë thirrje subjekteve opozitare parlamentare që t’i thërrasin mendjes dhe ta votojnë Qeverinë Konjufca 1. Ende pa përfunduar mbledhja e Këshillit të LVV-së, ne kemi parë përgjigjet e disa subjekteve, mirëpo, duke uruar që të ndryshojnë qasje e mendje, ne brenda afatit sigurisht se do të njoftojmë për thirrjen e seancës ku do të hidhet në votim mandatari ynë”, deklaroi Arlind Manxhuka nga LVV-ja.
Por, këto ftesë serioze nuk i ka parë kryetari i Aleancës për Ardhmërinë e Kosovës, Ramush Haradinaj.
Ai tha, që subjekti i tij është i vendosur për zgjedhje te reja
“Ka kërkesa për takime por nuk mendoj që takimet janë diçka që ia vlen. Po lutemi për zgjedhje te reja sa me shpejt. Kanë kërkuar zotri Konjufca për komunikim ose nga zyra e tij, ka pasur kërkesa për takim, por nuk e shohim që me shku në takime ta zëmë si ajo shprehja “Qitma votën si vëlla se e du Kosovën, Kosovën nuk është që e do vetëm një të gjithë e duam dikush më shumë ndoshta”, deklaroi Haradinaj.
E këto përpjekje të Vetëvendosjes po i sheh vetëm sa për sy e faqe profesori universitar, Avdi Smajljaj.
Ai thotë se kjo po bëhet për dy qëllime.
“Njëri mund të jetë për të marrë edhe pak ditë kohë që zgjedhjet të shkojnë ka fundi i dhjetorit, kur janë edhe shumica e diasporës këtu dhe ne e dijmë që pjesa më e madhe e diasporës vazhdon ende që ta mbeshtesë fuqishëm Vetëvendosjen, ose mund të ketë kalkulu që partitë të bëjnë ndonjë veprim tjetër të paparashikueshëm sic kanë bërë me votimin e kryekuvendarit Basha ose ndarjen në pako të nënkryetarëve të Kuvendit nga komunitetet jo shumicë, një veprim që ka qenë i papritur por që e kanë bërë Qeverinë”, deklaroi ai.
Glauk Konjufca është mandatari i dytë i Vetëvendosjes. Seanca pritet të mbahet më 19 nëntor.
Deri më tani, PDK, LDK, dhe AAK kanë insistuar që vendi të shkojë në zgjedhje të parakohshme, duke theksuar që nuk kanë votë për mandatarin e propozuar nga Lëvizja Vetëvendosje për kryeministër.
