Kryeministri i Sllovakisë, Roberto Fico, është plagosur në qytetin Handlova.
Ai është dërguar në spital pas një incidenti me të shtëna, transmeton Reuters.
Mediumi “Denník N” shkruan se një nga reporterët e tij nuk e pa vetë incidentin, por dëgjoi disa të shtëna dhe më pas pa kryeministrin të ngrihej nga rojet e sigurisë dhe u fut në një makinë.
Në lidhje me ngjarjen, raportohet se është arrestuar një person.
Gazetarët, të cilët ishin në vendin e ngjarjes, thanë se u dëgjuan disa të shtëna me armë.
Ata shtuan se zyrtarët e sigurisë e futën një person në një veturë dhe u larguan me shpejtësi.
I arrestuari besohet se është i dyshuari që shtiu mbi kryeministrin, megjithëse kjo nuk është konfirmuar nga policia lokale.
Zyra e kryeministrit nuk e ka komentuar rastin ende.
Presidentja e Sllovakisë, Zuzana Caputova, e dënoi sulmin “brutal dhe të pamëshirshëm” ndaj kryeministrit.
“Jam e tronditur”, tha Caputova.
“Robert Ficos i uroj shumë forcë në këtë kohë të vështirë, si dhe shpresoj se do ta marrë veten shumë shpejt nga ky sulm”, tha ajo.
Presidentja e Komisionit Evropian, Ursula von der Leyen, e dënoi sulmin ndaj Ficos.
“Veprime të tilla të dhunës nuk kanë vend në shoqërinë tonë dhe e minojnë demokracinë, të mirën tonë të përbashkët”, tha ajo.
