Deputeti i LDK-së, Anton Quni ka thënë se pilotimi i presidentes, Vjosa Osmani me helikopterë mund të jetë mesazh që Kosova mund të pajiset në të ardhmen më lloje të tillë nga SHBA-ja.
Ai tha se ndodhur edhe në të kaluarën që në takime të përcillen mesazhe për donacione të ndryshme pasuese.
“Ka ndodhur edhe në të kaluarën kur ka pasur takime dhe është dhënë mesazhi paraprakisht që Kosova do të mbështetet me donacione me forma të ndryshme. Një nga kapacitetet që nuk janë zhvilluar tek ne edhe në sektorin civil dhe në atë ushtarak janë kapacitetet e flotës ajrore. Është shumë e mundur që është një ndër mesazhet e SHBA-së që në të ardhmen që ne mundemi me supozu një ndihmë të fuqishme nga autoritetet e SHBA-së për t’i ngritur këto kapacitete”, ka thënë ai në emisionin “Info Nata” në Tëvë1.
Ai tha se Kosova ka nevojë për helikopterë të spektrave të ndryshëm, jo vetëm për ata sulmues.
Ndryshe, Osmani e cila ndodhet për vizitë në Shtetet e Bashkuara të Amerikës ka marr mësimin e parë në pilotimin e helikopterit prej njërit ndër pilotët më me përvojë, Joe Decapite.
Osmani në një postim në X shkruan se ndihet e nderuar që mori mësimin e parë në një nga kompanitë kryesore në botë në projektimin dhe prodhimin e helikopterëve.
“Më pëlqeu mësimi im i parë i pilotimit të helikopterit me pilotin Joe Decapite—një nga pilotët më me përvojë të Bell-it, i cili gjithashtu shërbeu në Kosovë 15 vjet më parë. E nderuar të mësoj nga më të mirët në një nga kompanitë kryesore në botë në projektimin dhe prodhimin e helikopterëve”, ka shkruar ajo./teve1.info
