Këshilli Prokurorial i Kosovës ka njoftuar se prokurori i Prokurorisë Themelore në Prizren, Beqë Shala, është pezulluar përkohësisht nga detyra, pas arrestimit të tij të hënën nën dyshimin për marrje ryshfeti.
Në arsyetimin e vendimit, Këshilli thekson se pezullimi është vendosur unanimisht dhe do të zgjasë deri në përfundimin e procedurës penale.
“Këshilli Prokurorial i Kosovës, në përputhje me kompetencat e tij kushtetuese dhe ligjore, pas pranimit të njoftimit zyrtar nga Prokuroria Speciale e Republikës së Kosovës (PSRK), përmes të cilit është konfirmuar se është iniciuar hetim penal ndaj të pandehurit Beqë Shala, prokuror në Departamentin e Përgjithshëm të Prokurorisë Themelore në Prizren, ka vendosur unanimisht që të pezullojë përkohësisht nga detyra zyrtare prokurorin Beqë Shala, deri në një vendim tjetër të Këshillit, përkatësisht deri në përfundimin e procedurës penale që është në zhvillim e sipër,” thuhet në njoftimin e Këshillit.
Sipas njoftimit nga Sistemi Prokurorial i Kosovës, Shala u arrestua në vendin e punës nga autoritetet kompetente për dyshimin e marrjes së ryshfetit.
