Me urdhër të prokurorit të shtetit janë ndaluar pesë zyrtarë policorë në lidhje me vdekjen e 27-vjeçarit nga Lipjani.
Kryeprokurori Zejnullah Gashi ka konfirmuar për Tëvë1 se rasti është cilësuar si “vrasje nga pakujdesia”, ndërkohë që hetimet janë në zhvillim e sipër për të ndriçuar rrethanat e ngjarjes tragjike.
Ndërkohë, Inspektorati Policor i Kosovës ka bërë të ditur se ka rekomanduar suspendimin e përkohshëm të pesë zyrtarëve policorë të përfshirë në intervenimin, përfshirë një rreshter dhe katër zyrtarë të tjerë.
Rasti ka nxitur reagime të shumta në opinionin publik, ndërsa familja e të ndjerit ka kërkuar zbardhjen e plotë të ngjarjes dhe drejtësi për Agonin.
Hetimet pritet të zbardhin përgjegjësitë e mundshme ligjore të zyrtarëve policorë në këtë rast të ndjeshëm.
Po ashtu edhe Inspektorati Policor i Kosovës ka njoftuar se pesë zyrtarë policorë – një rreshter dhe katër zyrtarë të tjerë – janë arrestuar lidhur me incidentin që çoi në vdekjen e një qytetari në Lipjan.
Arrestimet u kryen pas intervistimit të tyre në cilësinë e të dyshuarve, me autorizim të Prokurorisë Themelore në Prishtinë.
IPK bëri të ditur se ndaj tyre është caktuar masa e ndalimit prej 48 orësh, ndërsa hetimet po vazhdojnë në koordinim me Prokurorinë e Shtetit, duke përfshirë edhe ekzaminimet mjeko-ligjore dhe veprime të tjera hetimore për ndriçimin e plotë të rastit.
