Pesë persona janë lënduar si pasojë e një aksidenti trafiku që ka ndodhur në orët e hershme të mëngjesit të së enjtes në fshatin Besi, në Prishtinë.
Sipas policisë, në aksident kanë qenë të përfshira tri automjete në lëvizje.
Zëdhënësja e Policisë së Kosovës për rajonin e Prishtinës, Flora Ahmeti, ka konfirmuar rastin duke bërë të ditur se ngjarja është raportuar rreth orës 01:00.
“Sot rreth orës 01:00 kemi pranuar informatën se në fshatin Besi të Prishtinës ka ndodhur një aksident trafiku me lëndime. Në këtë aksident kanë qenë të përfshira tri automjete në lëvizje. Si pasojë e aksidentit janë lënduar pesë persona”, ka deklaruar Ahmeti.
Ajo shtoi se të lënduarit kanë marrë trajtimin e nevojshëm mjekësor, ndërsa rasti është duke u hetuar nga njësiti i trafikut rajonal.
“Me rastin po merret njësiti i trafikut rajonal”, ka theksuar ajo.
