Prokuroria Themelore në Prishtinë, njofton opinionin publik se në koordinim të plotë me Policinë e Kosovës-Drejtoria për Hetimin e Krimit të Organizuar dhe Krimeve të Rënda, kanë zhvilluar hetime intensive, me qëllim të zbardhjes së veprimtarisë kriminale të disa personave të dyshuar në kryerjen e veprës penale “Falsifikimi i dokumenteve”.
Prokuroria Themelore në Prishtinë ka njoftuar se në një operacion të përbashkët me policinë e Kosovës, janë arrestuar pesë persona të dyshuar për falsifikim të dokumenteve.
Prokuroria ka bërë të ditur se gjatë operacionit të realizuar në pesë lokacione në Prishtinë dhe Mitrovicë Jugore, në mesin e të arrestuarve është dhe një shtetas i Shqipërisë.
“Gjatë realizimit të operacionit policor janë arrestuar të dyshuarit me iniciale si në vijim: K. K. viti i lindjes 1965 m/kosovar, G. T. viti i lindjes 1969, m/shqiptar/Shqipëri, E. A. viti i lindjes 1970 m/kosovar, H. H. viti i lindjes 1978, m/kosovar, E. R. viti i lindjes 1992, m/kosovar”, thuhet në komunikatë, përcjell teve1.info
Poashtu bëhet e ditur se gjatë kontrollit të kryer në prona/shtëpi banimi, janë gjetur pajisje për prodhimin e dokumenteve të udhëtimit për në shtete të ndryshme të cilat janë sekuestruar në cilësi të provave materiale: (21) pasaporta të shteteve të ndryshme evropiane, (5) leje qëndrimi, letërnjoftime dhe patentë shoferë të shteteve të ndryshme,Pajisje dhe materiale te ndryshme elektronike që dyshohen për prodhimin e dokumenteve,(4) telefona mobilë, (1860) euro, (48700) lekë, (10) funta, (395) lira turke, (1) veturë me targa të Kosovës, (1) veturë me targa të Shqipërisë”
Me vendim të Prokurorit të Shtetit, pesë (5) të dyshuarit e arrestuar janë dërguar në mbajtje, si dhe për të njëjtit është ushtruar kërkesë për caktimin e masës së paraburgimit, në drejtim të veprës penale “Falsifikimi i dokumenteve”, nga neni 390 paragrafi 3 lidhur me paragrafin 1 të KPRK-së.