U themelua në kohë lufte.
Radio “Kosova e Lirë”, ka 25 vjet që vazhdon të dëgjohet nga Malet e Berishës.
E valët e kësaj radioje, edhe një herë të premten mblodhën qindra qytetarë në fshatin Berishë të Malishevës.
Krejt kjo për ta shënuar 25 vjetorin, kur kjo radio e transmetoi emisionin e fundit në kushte lufte.
Por, në këtë përvjetor, për shkaqe shëndetësore mungoi drejtori i kësaj radioje, Ahmet Qeriqi.
“S’mund të mos e kujtojmë, drejtorin Ahmet Qeriqi, i cili ka drejtuar, organizuar dhe ka përpiluar lajmet, ka qenë përgjegjësi kryesor i radios ‘Kosova e Lirë’”, tha zëvendëskomandanti në Pashtrik, Sadik Halitjaha.
Nga atje vetura të shumta të të pranishmëve, u drejtuan për në Majën e Pallanikut.
Kjo pasi gjithçka ishte bërë gati, për përurimin e bunkerit nga ku u dhanë lajmet e luftës.
Nga vendin e njëjtë, të pranishmëve iu drejtua edhe një herë zëri të cilin e njohin gjithë shqiptarët.
Ish-zëri i kësaj radioje, Nusret Pllana, kujtoi fjalët e fundit që i tha në kohë lufte.
“Këtu e 25 vjet me parë, e kemi dhënë programin e fundit të transmetimit të radios “Kosova e Lirë”, nga ky bunker e kemi kumtuar lajmin më të mirë të mundshëm, kur kam thënë “Sot me 21 qershor 1999, po e përfundojmë programin e radios, me kapitullimin e Serbisë fashiste në Kosovë”, tha Pllana..
E gjithë teknika e kësaj radioje në kohë luftë, ishte dhuruar nga artisti, Ismet Bexheti.
“Ndihem tepër i nderuar, tepër i përmbushur, që kam qenë pjesë sado e vogël e një mrekullie kaq të madhe që ka ndodh në Kosovë, me radion ‘Kosova e Lirë’ që kanë qenë armë më e fuqishme e së vërtetës së Kosovës”, tha këngëtari.
E intonimi i himnit kombëtar e atij shtetëror të Kosovës, ngriti në këmbë të pranishmit.
“Ju që sot jeni ngjitur këtu, atëherë padyshim që do të ishit të gatshëm të na i jepnit çdo ndihmë të mundshme. Ne me ishim një grusht njerëzish që cdo ditë bënim përpjekje të ishim pranë jush”.
E këtu u nderuan të gjithë ata kontribuuan në rindërtimin e këtij bunkeri.
Njëri nga ta ishte gazetari i Tëvë1, Fidan Zejnullahu.
“Fidan Zejnullahu është sebep siç thotë populli, për rregullimin e bunkerit dhe ngritja e kësaj antene gjigante. Atëherë ishte gazetar në T7, e tash gazetar në Tëvë1. Kur e pa në këtë gjendje kaq të mjerueshme bunkerin, më thirri më tha, profesor po shkojmë në vend të ngjarjes dhe po e xhirojmë pak dhe me trego se bash deri në këtë ditë ka ardh bunkeri. Pastaj erdhi e bëri një storie aq të mirë, saqë pati miliona shikime dhe u bë shumë virale, pastaj me kronika na përcjelli rregullisht, prandaj faleminderit deri në qiell, Fidan Zejnullahu”, tha ish-moderatori i radios.
E momenti i pritur për 25 vjet, erdhi në mesditën e së premtes.
Ndërkohë, u zbulua edhe obelisku, që përmban historikun e radios “Kosova e Lirë”.
Ndryshe, kjo radio u formua nga shtabi i përgjithshëm i UÇK-së më 4 janar të vitit 1999.
