Situata e zjarreve në Shqipëri paraqitet në përmirësim, ndërsa deri në orën 14:00 të 24 gushtit janë raportuar 18 vatra zjarri, nga të cilat 5 vijojnë aktive dhe 7 janë nën mbikëqyrje.
Sipas Ministrisë së Mbrojtjes, në operacionet e ditës së sotme janë angazhuar 216 forca operacionale dhe 8 automjete zjarrfikëse.
Forcat e Armatosura kanë mbështetur operacionet me 70 efektivë, 1 automjet zjarrfikës, 1 ekskavator të rëndë dhe 2 helikopterë.
Vëmendja kryesore vijon të jetë përqendruar në malin e Dajtit, ku operacioni po zhvillohet me 30 efektivë të Forcave të Armatosura, 30 zjarrfikës dhe mbështetje nga ajri me helikopter. Pavarësisht terrenit të vështirë, nuk raportohet rrezik për zonat e banuara.
Në Pukë, situata paraqitet me përmirësim të ndjeshëm. Zjarri në Gjegjan, Gojan të Vogël dhe Gojan të Madh është shuar plotësisht, ndërsa vatra në Prozhëm vijon me intensitet shumë të ulët dhe është drejt shuarjes.
Në zonë janë angazhuar forca vendore, vullnetarë dhe 40 efektivë të Forcave të Armatosura, të mbështetur nga mjete dhe një helikopter.
Në qarkun Dibër vijojnë aktive vatrat në Ballenjë dhe Qafën e Helmës, pa rrezik për zonat e banuara, ndërsa zjarri në Bërshi është shuar plotësisht.
Në qarkun Lezhë, vatrat në Lufaj dhe Shtuf janë deklaruar të fikura, ndërsa Kalivaçi dhe zona e Tenës vijojnë të mbahen nën mbikëqyrje.
Ndërkohë, në Elbasan dhe Vlorë vijon monitorimi i disa vatrave, pa rrezik për banesat.
Një vatër e re aktive është raportuar në malin e Luzatit, në Tepelenë, ku strukturat zjarrfikëse vendore po ndërhyjnë për vënien e saj nën kontroll.
Strukturat e mbrojtjes civile vijojnë të jenë të angazhuara në terren, me fokus shuarjen e plotë të vatrave aktive, monitorimin e zonave të prekura dhe parandalimin e riaktivizimeve.
