Një marrëveshje pako për kryesinë e Kuvendit, vazhdohet të cilësohet si zgjidhja e vetme për kalimin e ngërçit në Kuvend, nga Lëvizja Vetëvendosje.
Kryeministri në detyrë, Albin Kurti, tha se edhe për këtë ka hezitim nga partitë e tjera politike.
Ai në Këndin e Debatit, shpjegoi se si kjo marrëveshje do t’i hapte rrugë konstituimit të Kuvendit.
“Të merremi vesh në paketë, për përbërjen e kryesisë së Kuvendit sepse Kryesia e Kuvendit nuk është vetëm kryetarja, është kryetarja dhe pesë nënkryetarët, nga të cilët vetëm njëri është i Lëvizjes Vetëvendosje. Dhe kur të merremi vesh për këtë, atëherë shumë kollaj. Nëse nuk e doni kurrsesi votimin e fshehtë, atëherë meqë procesi ka ngelur në tek përfaqësuesit e partive tjera për komisionin për votim të fshehtë, dërgoni përfaqësuesit, po e rrëzojmë komisionin me votë të përbashkët dhe po kthehemi tek vota e hapur, ku e votojmë komplet kryesinë e Kuvendit”, deklaroi Kurti.
Kurti mbrëmë foli gjerë e gjatë për shumë tema, në intervistën me Ardi Visokën.
Shpjegoi edhe shprehjen “nomadë” për deputetët e Kuvendit.
“Pse vjen deputeti në Kuvend, edhe kthehet? Nuk është si me hy në shtëpi, është si me hy në shator. Prandaj është edhe qekjo figura e deputetit nomadik. Më vjen keq nëse dikush është ofenduar”, tha Kurti.
Këtë javë, u vunë gurthemelet e dy urave të reja mbi lumin Ibër në Mitrovicë, por sipas Kurtit akoma ka shpresë se do të hapet edhe ura kryesore.
“Ne nuk dëshirojmë fërkime me karabinierët italianë. Me shumë durim dhe vazhdimisht bisedojmë që të hapet ajo urë. Unë besoj që do të hapet ajo urë, sepse duhet të hapet. Është edhe marrëveshja nga Brukseli që duhet zbatohet përkitazi me atë urë. Por, në ndërkohë po i ndërtojmë edhe dy ura të reja”.
Ditë më parë, presidenti amerikan, Donald Trump, tha se SHBA-ja ka ndikuar në parandalimin e një konflikti mes Serbisë dhe Kosovës.
Për këtë rrezik nga Serbia, Kurti tha se nuk kanë informacione.
“Se çfarë ka bërë plan konkret operacional kundër Kosovës Serbia, mbase ne nuk e dimë. Është e pritshme që nuk mund ta dimë. Tash, organet tona bashkëpunojnë me Shtetet e Bashkuara të Amerikës dhe mbase një ditë do t’i kemi edhe ne ato informacione”, tha Kurti.
Sipas tij, në kohët në vazhdim, këto informacione nga SHBA, mund të jenë të disponueshme për institucionet relevante kosovare.
