Një ngjarje e rëndë ka ndodhur pasditen e sotme në Istog, ku një person ka pësuar lëndime të rënda trupore, që dyshohet se janë shkaktuar me një sëpatë.
Sipas informacioneve të para, incidenti ka ndodhur pas një përleshjeje fizike mes viktimës dhe një personi të dyshuar.
Lajmin e ka konfirmuar për medie zëdhënësi i Policisë për rajonin e Pejës, Fadil Gashi.
“Njëri nga të përfshirët ka pësuar lëndime të rënda dhe është transportuar për trajtim mjekësor në Emergjencën e Spitalit Rajonal të Pejës,”
ka deklaruar Gashi.
Sipas tij, i dyshuari, i cili është i njohur për organet e rendit, ka arritur të largohet nga vendi i ngjarjes dhe aktualisht është në kërkim nga Policia e Kosovës.
Policia ka nisur hetimet për zbardhjen e plotë të rastit, ndërsa viktima po trajtohet nga mjekët për shkak të plagëve të marra.
