Rruga drejt Pojatës këtë të shtunë nuk ishte si zakonisht.
Që nga ora 11:00, fshati në Komunën e Ferizajt u mbush me qytetarë, familjarë e bashkëluftëtarë.
Të gjithë u mblodhën për një qëllim.
27 vjet pas rënies, u zbulua busti i dëshmorit Gëzim Sahiti.
Ky i fundit ra heroikisht në frontin e luftës më 25 prill 1999, në Kosharen legjendare.
Krah tij, u vendosën edhe pllakat përkujtimore për gjashtë martirët e fshatit, të rënë për lirinë e vendit.
E para që e solli kujtimin për të ishte vajza e tij, e cila foli për mungesën që e ka shoqëruar që nga fëmijëria.
“Kur babai im ra dëshmor, unë isha vetëm pesë vjeç, ndërsa vëllai im ishte vetëm dy vjeç. Ne nuk patëm mundësi ta njohim sa duhet, por figura e tij ka jetuar gjithmonë në zemrat tona, në rrëfimet e familjes dhe në respektin e të gjithë bashkëfshatarëve. Edhe pse u rritëm pa praninë e tij, gjithmonë e kemi ndjerë forcën dhe emrin e tij pranë nesh”, thotë vajza e Gëzim Sahitit, Marigona.
Për figurën e tij foli edhe komandanti, i cili e kujtoi si një nga ushtarët që jepte forcë në momentet më të vështira.
“Si komandant i tij, dëshmoj se Gëzimi ishte një nga ushtarët që i japin forcë njësisë, që i japin zemër luftës dhe që e bëjnë dallimin në momentet më të vështira”, thotë komandanti i tij, Shiqer Maloku.
Ndërkaq një nga bashkëluftëtarët rikujtoi momentet e fundit me të.
“Më kujtohet dita e fundit, ai e këndonte këngën Besa Besë pa kurrfarë frike dhe mori pjesë në beteja direkte së bashku edhe me komandantin Sali Çeku i cili ishte nder për ne të luftonim në ato vija të frontit”, thotë ish-ushtari Hashim Feka.
Në ceremoni morën pjesë edhe përfaqësues institucionalë.
“Pojatës sot po i rikthehen bijtë e saj në bronz të pathyeshëm, të palëkundshëm ndër stuhi të historisë ashtu si lavdia e tyre, e rrënjosur thellë në damarët ku frymon liria jonë”, tha kryetari i Komunës, Agim Aliu.
“Ne jemi mbledh sot për ta përjetësuar një djalë të ri, por të devotshëm, një trim të guximshëm, që sakrifikoi jetën e tij për të qenë ky popull i lirë”, u shpreh deputeti Elmi Reçica.
E një fjalë e tha edhe i pari i fshatit i cili theksoi se ky bust është më shumë se simbol.
“Me këtë vepër, ne nuk po vendosim vetëm pllaka dhe bronz, por po vendosim kujtesën, mirënjohjen tonë për ata që dhanë më të shtrenjtën, jetën e tyre për lirinë dhe pavarësinë e shtetit tone”, tha kryetari i fshatit, Ibrahim Latifi.
Gëzim Sahiti prehet në Kompleksin Memorial të Dëshmorëve në Koshare.
