Ka përfunduar gjykimi për krime lufte i ish gardianit serb, Dragisha Milenkoviq.
Në seancën e fundit, Milenkoviq mohoi sërish fajësinë.
I prangosur erdhi në seancën e fundit të gjyqit të tij.
Gjykimi i Dragisha Milenkoviq për maltretimin dhe keqtrajtimin e të burgosurve politik në burgun e Lipjanit dhe Prishtinës, pas 20 muajve arriti në fazën finale.
Edhe këtu, Milenkoviq mohoi fajësinë.
“Unë 25 vite jam sillur lirshëm në Prishtinë Askush nuk ka pasur asnjë vërejtje. A është e mundshme që këta njerëz, asnjë prej tyre nuk ka dashur ta lajmëroj rastin se i kemi maltretuar. Kolegët e mi shqiptarë e dijnë se ata njerëz nuk kanë qenë të maltretuar në burgje”, ka deklaruar i akuzuari Dragisha Milenkoviq.
Palët dhanë fjalët e tyre të fundit.
Organi akuzues kërkoi dënimin e ish gardianit, kurse mbrojtja lirinë e tij.
Prokuroria potencoi se përgjatë gjyqit, janë vërtetuar akuzat që rëndojnë mbi Milenkoviq.
Prokurori argumentoi se deklaratat e të gjithë dëshmitarëve kanë konfirmuar dhunën e ushtruar.
Në fjalën përfundimtare, mbrojtja vuri theksin në disa deklarime të vet Milenkoviqit.
“Në gjyq e kemi dëgjuar edhe Dragishën. Ai ka thënë se keqtrajtimi ka ndodhur ana e sigurimit shtetërorë dhe se këtë gjë nuk e kanë bërë gardianët e burgut. Po ashtu, ka thënë diçka që të gjithë të dëmtuarit e kanë fshehur. Se struktura etnike ka qenë e ndarë, gardianët shqiptarë kanë qenë në numër më të madh se numri i gardianëve serbë”, ka deklaruar avokati i Milenkoviqit, Dejan Vasiq.
Kësisoj, sipas mbrojtjes lirimi i Dragishës, është i vetmi opsion.
“Pas kësaj i vetmi aktgjykim i mundshëm është aktgjykimi lirues për Dragishën. Sepse në asnjë mënyrë nuk është provuar se ai ka berë atë se çfarë i vihet në barrë në aktakuzë”, deklaroi avokatja e Milenkoviqit, Jovana Filipoviq.
Milenkoviq akuzohej edhe për armëmbajtje pa leje, vepër të cilën ai e kishte pranuar.
Dragisha Milenkoviq akuzohet se nga 24 maji 1999 e deri më 10 qershor 1999, në burgun e Lipjanit dhe të Prishtinës, në cilësinë e gardianit, bashkë me persona të tjerë në mënyrë sistematike kishin keqtrajtuar të burgosurit shqiptarë, duke i torturuar në mënyrë ç‘njerëzore, maltretuar dhe shkaktuar lëndime trupore.
