Për të fundit herë për këtë vit, u paraqitën në gjykatore.
Të akuzuarit për sulmin terrorist në Banjskë të Zveçanit, Blagoje Spasojeviq, Dushan Maksimoviq dhe Vladimir Toliq, dëgjuan pjesën më të madhe të dëshmitarëve të prokurorisë.
Për dëgjimin e dy të fundit, seancat pësuan zvarritje.
Përkundër përpjekjeve, serben Dragana Antonijeviq, organet e drejtësisë nuk arritën ta sjellin për të dëshmuar.
“Ne sipas agjendës kemi planifikuar që të dëgjohet dëshmitarja Dragana Antonijeviq, e cila nuk prezanton në seancën e sotme gjyqësore, për të cilën dy herë radhazi ftesën e ka pranuar babai i saj në adresën të cilën e ka poseduar Gjykata dhe thotë se e njëjta ndodhet në Serbi”, ka thënë Hoti.
Bazuar në këto tentativa të pasuksesshme, prokuroria propozoi që të lexohet deklarata e Antonijeviq, e dhënë më herët ne prokurori.
“Konsideroj se janë plotësuar kushtet për faktin se dëshmitarja fillimisht e ka dhënë deklaratën e saj në prokurori, kjo deklaratë është dokumentuar mbi bazën e procesverbaleve zyrtare të kësaj prokurorie. Gjithashtu janë plotësuar kushtet për të zbuluar këtë procesverbal palës mbrojtëse dhe palës së dëmtuar”, është shprehur Abazi.
Në anën tjetër, mbrojtja e Dushan Maksimoviq si të rëndësishme e vlerësoi dëshminë e Dragana Antonijeviq në gjykatore.
“Dragana ka qenë punonjëse në ranjska banja sikur dushan maksimoviq dhe prokuroria është dashur që ta marrë në pyetje në lidhje me dushan maksimoviq se kur ka qenë i punësuar, ku ka punuar dhe përkatësisht për pjesën ku shihet dushan maksimoviq para hotelit ranjska banja, ku prokuroria e merr si provë derisa ai vetëm ka qenë në vendin e tij të punës”, ka thënë Filipoviq.
Megjithatë, trupi gjykues aprovoi propozimin e prokurorisë, që të merret si provë deklarata e kësaj dëshmitareje.
Edhe dëgjimi i dëshmitarit të fundit të Prokurorisë Speciale, nuk ishte i munduar të realizohet, por kjo për shkaqe teknike.
“Goran Tanevski, i cili jeton në Republikën e Maqedonisë së Veriut. Po ashtu, Gjykata disa herë me radhë ka bërë përpjekje për sigurimin e një video konferencë me Gjykatën e Shkupit, por të cilët janë përgjigjur se nuk posedojnë pajisje, por kanë lënë mundësinë e hapur që në të ardhmen të realizohet një lidhje e tillë”, u shpreh tutje Hoti.
Rrjedhimisht, ky dëshmitar u la pezull, derisa u aprovua dëgjimi i një dëshmitari nga radhët e mbrojtjes.
Dëgjimi i tij do të bëhet në seancën që do të mbahet në muajin janar të vitit të ardhshëm.
