Një zjarr ka shpërthyer sot në një ndërtesë banimi pranë shkollës “Meto Bajraktari” në Prishtinë.
Rastin e ka konfirmuar zëvendëskomandanti i Brigadës së Zjarrfikësve në Prishtinë, Abdusamed Shkodra, i cili bëri të ditur se zjarri ka përfshirë banesën në katin e gjashtë të objektit dhe nuk ka persona të lënduar.
Sipas tij, flakët kanë nisur në kuzhinë, ndërsa njësitë zjarrfikëse janë njoftuar rreth orës 13:06 dhe kanë reaguar duke dalë në vendin e ngjarjes.
Shkodra tha se situata është vënë shpejt nën kontroll dhe zjarri tashmë është fikur plotësisht. Ai theksoi se banorët kishin dalë vetë nga ndërtesa, ndaj nuk ka pasur nevojë për evakuim shtesë nga ekipet emergjente.
Pas përfundimit të intervenimit, zjarrfikësit janë larguar nga vendi i ngjarjes.
“Nuk ka të lënduar me këtë rast. Zjarri është fikur tashmë dhe gjithçka është nën kontroll. Banorët veçse ishin dal nga ndërtesa dhe nuk ka pasur nevojë për ndonjë evakuim. Ekipet janë duke u kthyer nga vendi i ngjarjes”, u shpreh ai.
