Më 1 prill të vitit 1999 në Lybeniq të Pejës në orët e hershme të mëngjesit, formacionet ushtarake, policore, militare dhe paramilitare e kishin rrethuar në të gjitha anët këtë fshat i cili shtrihet rrëzë Alpeve Shqiptare dhe në mes të fshatit Raushiq dhe Strellc, ku vranë shumë persona.
E përfaqësuesi i këtij fshati, Nezir Jahmurataj duke folur për akuzat ndaj gjenocidit serb në Kosovë, respektivisht në këtë fshat tha se edhe sot në qytetarë serb të cilët sipas tij, mund të kenë informacione se çka është bërë me shqiptarët të ilët u vranë më 1 prill, hyjnë në Kosovë pa i penguar askush.
Madje ai shtroi pyetjen se “a kemi të drejtë si qytetarë që njerëzit/qytetarët që vijnë nga Serbia në Kosovë me i trajtu pak, me i ndalë ngapak”.
“Vijnë lirshëm shembull një numër i serbëve të Lybeniqit vijnë në Pejë shesin toka, por ata dijnë diqka nuk ka qytetarë serb i fshatit Lybeniq që nuk e din çka u bë me njerëzit tanë të vrarë me 1 prill”, tha përfaqësuesi i këtij fshati në emisionin “Këndi i Debatit” në Tëvë1.
Derisa analisti, Arton Demhasaj tha se po të kishte qenë shteti serb në pozitën që ka qenë Kosova, do t’i kishte arrestuar ata qytetarë për të marrë ndonjë informacion.
“Imagjinojeni këtë situatë ndryshe, me qenë dëshmitarë shqiptar që kanë qenë në krime të ndryshme të supozuara që i kan shkijet, që janë bërë në drejtim të tyre e me shku ti në Serbi, ata menjëherë kanë me të arrestu dhe me të bë pyetje që me mujt me nxjerrë informacione prej teje. E ne nuk e bëjmë këtë”, shtoi analisti Demhasaj.
Ndryshe, kryeministri i Kosovës, Albin Kurti, në 25-vjetorin e masakrës në fshatin Lybeniq të Pejës, bëri homazhe pranë lapidarit të 79 të vrarëve të këtij fshati.
Kreu i qeverisë, nga atje kërkoi që sistemi i drejtësisë të adresojë me urgjencë rastet e kryera gjatë luftës.
“Shpresoj të deponohen sa më shumë dëshmi për krimet e kryera këtu në Kosovë. Ndërkaq sistemi të drejtësisë nga këtu i bëj thirrje edhe një herë për adresim me urgjencë të rasteve të kryera gjatë luftës, sepse këto krime asnjëherë nuk janë vjetruar, por dëshmitarët janë gjithnjë e më të moshuar. Në Policinë e Kosovës në të kaluarën krimet e luftës janë trajtuar në kuadër të hetimeve të krimeve të rënda”, u shpreh ai.
