Prej 19 ditësh, protestuesit në sheshin “Skënderbeu” në Tiranë, po kundërshtojnë ndërtimin e një resorti luksoz në jug të Shqipërisë.
Me këto thirrje po kërkohet edhe largimi nga pushteti i kryeministrit Edi Rama, mirëpo protestuesit s’po e duan as rikthimin e Sali Berishës.
Në këto 19 ditë, rrugët e Tiranës u mbushën me shqiptarë nga të gjitha qytetet e Shqipërisë.
Nuk munguan as prindërit me fëmijë.
“Nuk po bëhet fjalë vetëm për Zvërrnecin po bëhet fjalë për të gjitha tokat tona që po shiten dhe ne nuk po mundemi as të shkojmë dot në vendin tonë për ta shijuar, unë jam një person që bëj shumë udhëtime dhe në vendet e tjera ka shumë mikpritje, ndërsa këtu nuk mund të shkosh as në Durrës të marrë cadrën time për të vendosur sepse të vijnë si në Zvërrnec të tërheqin zvarrë”, deklaroi qytetarja Manjola Gega.
Pjesëmarrësit në protestë thonë se nuk po kundërshtojnë vetëm ndërtimet luksoze në jug.
“Unë protestoj për kalamajt e mi, arsyeja e parë është që në fshatin Lufaj nuk ka shkollë, nuk ka një qendër shëndetësore dhe nuk ka rrugë”, tha banori i fshatit Lufaj në Mirditë, Jor Gjinacaj.
Përkundër protestave, kryeministri Edi Rama ka deklaruar se përderisa ai të jetë në pushtet, investimi rreth 1.9 miliardë dollarësh nuk do të ndalet.
E për protestën që tashmë po emërtohet edhe si “Revolucioni i Flamingove”, në vazhdimësi janë duke raportuar mediat ndërkombëtare.
