Nga korriku i vitit 2024, u ngarkua me punë të ambasadores së SHBA-së në Kosovë.
Kjo përgjegjesi, ra mbi Anu Prattipatin, pasi ambasadorit, Jeff Hovenierit, i përfundoi mandati.
E së fundmi, u bë e ditur se për tri shtete të rajonit, Shtetet e Bashkuara të Amerikës nominuan ambasadorët.
Këta të fundit pasti të marrin miratimin e senatit, do të shërbejnë si ambasadorë në Bosnje Hercegovinë, Serbi e Mal të Zi.
Por, në mesin e 17 emrave të propozuar për ambasadorë të SHBA në botë, nuk figuroi ai për Kosovën.
E mospërfshirja e Kosovës në këtë listë nominimesh, vlerësohet si lajm jo i mirë.
“Nuk është një lajm që i bën mirë në kuptimin diplomatik. Nganjëherë gjestet e vogla në diplomaci kanë domethënie të madhe. Ne akoma nuk e dijmë, nuk kemi ndonjë sinjal konkret që ky është një lloj refuzimi i Shteteve të Bashkuara të Amerikës. Unë mendoj se nuk duhet nxituar në këtë, sepse duhet pasur informacione, duhet parë kabllogramet edhe të ambasadës tonë që është në Uashington”, ka thënë Ukshini.
Mirëpo, mungesën e një ambasadori me mandat të plotë, dikush tjetër nuk e sheh problem.
Kjo pasi angazhimi i perkoheshëm i Prattipatit, konsiderohet se nuk lë hapësirë për shqetësime.
“Çka është me rëndësi për Kosovën është se Kosova është në marrëdhënie të përhershme me Shtetet e Bashkuara të Amerikës dhe nuk ka asgjë për t’u shqetësuar. Ambasada e Amerikës në Kosovë e ka zonjën Prattipati, një ambasadore e cila është një diplomate me karrierë të gjatë dhe mendoj se nuk ka asnjë problem, as ndonjë vakuum në aspektin e zhvillimeve ose të detyrave të SHBA-së në Kosovë. Kështu që, nuk besoj se duhet me pa si diçka që është e lënë anash”, u shpreh Korqa.
Ndryshe, nuk ka një afat të caktuar ligjërisht se sa mund të ushtrojë detyrën e ambasadorit një i ngarkuar me punë.
Ndërsa mandati i tij zgjat për aq kohë sa posti i ambasadorit mbetet vakant.
