Policia e Kosovës ka njoftuar se nga data 16 shkurt deri me 18 shkurt 2023, do të bëjë ndërprerje të përkohshme të qarkullimit të trafikut, të disa segmenteve rrugore.
Sipas njoftimit, kjo ndërprerje do të bëhet për shkak të vizitës së presidentit të Shqipërisë, Bajram Begaj dhe delegacionit shoqërues për nder të festës së Pavarësisë së Kosovës.
“Për të mundësuar qarkullim të lirë të eskortës zyrtare nën përcjellje dhe sigurim sipas itinerarit të lëvizjes, Policia e Kosovës do të bëjë ndërprerje të përkohshme të qarkullimit të trafikut (në intervale të shkurtra kohore), të disa segmenteve rrugore ku pritet të kalojë eskorta, si dhe në lokacione të caktuara ku parashihen të realizohen aktivitete zyrtare”, thuhet në njoftim.
Tutje theksohet se në disa segmente rrugore do të ketë ndërprerje të qarkullimit të automjeteve , andaj kërkohet mirëkuptim nga qytetarët nga ana e Policisë.
“Po ashtu, me rastin e shënimit të ‘15 vjetorit të shpalljes së pavarësisë së Kosovës’, gjatë realizimit të aktiviteteve festive lidhur me këtë shënim, për arsye të lëvizjeve të personaliteteve dhe pjesëmarrësve në shënimin e kësaj ngjarjeje, në disa segmente rrugore do të ketë ndërprerje të qarkullimit të automjeteve, do të ketë riorientim të trafikut në rrugë alternative, andaj Policia e Kosovës kërkon mirëkuptim të plotë nga ana e qytetarëve dhe pjesëmarrësve në trafik”, thuhet tutje./teve1.info./
