Prokurori i Shtetit ka njoftuar se gjatë 24 orëve të fundit janë ngritur 97 aktakuza kundër 114 personave për vepra të ndryshme penale në gjithë territorin e Kosovës.
Sipas njoftimit, me urdhër të prokurorëve janë ndaluar tetë persona, ndërsa është paraqitur edhe një kërkesë për caktimin e masës së paraburgimit ndaj një personi.
Prokuroria Speciale e Republikës së Kosovës gjatë kësaj periudhe ka ngritur dy aktakuza ndaj dy personave për veprat penale “Kanosja” dhe “Falsifikimi i parasë”.
Ndërkaq, Prokuroria Themelore në Prishtinë ka ngritur 35 aktakuza ndaj 39 personave për vepra të ndryshme penale, ndërsa ka ndaluar gjashtë persona dhe ka kërkuar paraburgim për një person lidhur me rast të dhunës në familje.
Sipas raportit, aktakuzat në Prishtinë përfshijnë vepra si lëndim i lehtë trupor, vjedhje, posedim të paautorizuar të armëve, dhunë në familje, mashtrim, falsifikim dokumentesh dhe trafikim të narkotikëve.
Edhe prokuroritë tjera themelore në Prizren, Pejë, Gjilan, Gjakovë, Mitrovicë dhe Ferizaj kanë raportuar për ngritje aktakuzash për vepra të ndryshme penale, përfshirë dhunë në familje, vjedhje, sulme, kanosje, posedim narkotikësh dhe armëmbajtje pa leje.
Sipas të dhënave të publikuara, Prokuroria Themelore në Ferizaj ka ngritur numrin më të madh të aktakuzave pas Prishtinës, gjithsej 18 aktakuza ndaj 25 personave./teve1.info/
