Bashkëkryetari i Guxo-s, Faton Peci, ka deklaruar se subjekti i tij preferon datën 28 dhjetor për mbajtjen e zgjedhjeve të jashtëzakonshme parlamentare. Këto komente ai i bëri pas takimit konsultativ të thirrur nga presidentja Vjosa Osmani me liderët e partive politike.
Peci tha se kanë diskutuar për përcaktimin e një date optimale dhe të favorshme për qytetarët, ndërsa sipas tij ajo që i përshtatet më së shumti procesit zgjedhor është 28 dhjetori.
“Pat diskutime të ndryshme se cila është data më optimale dhe më e favorshme për qytetarët e Kosovës. Ne si Guxo, mes datës 21 dhjetor dhe 28 dhjetor, kemi preferuar datën 28. Arsyeja është e thjeshtë: KQZ ende nuk ka certifikuar rezultatet e zgjedhjeve lokale,” tha Peci.
Ai shtoi se kjo datë do t’i mundësonte një koordinim më të mirë ndërinstitucional dhe përgatitje më efikase të të gjitha palëve të përfshira.
“Për shkak të nevojës për koordinim dhe përgatitje më të mirë të KQZ-së dhe të partive, si dhe për organizim më të mirë në nivel ambasadash dhe konsullatash në vendet e BE-së dhe SHBA-së, ne propozojmë 28 dhjetorin,” theksoi ai.
Sipas Pecit, kjo datë është më e favorshmja edhe për qytetarët brenda vendit, edhe për mërgatën.
“Mendojmë se data më e përshtatshme për qytetarin, për mërgatën dhe për institucionet është 28 dhjetori,” u shpreh ai.
