Gruda tha se Qeveria pasi ka kapur çdo institucion publik e ndërmarrje publike duke punësuar militantë të partisë, tani ka nisur përpjekjet, sipas tij kundërkushtetuese në administratën e shtetit.
“Me Ligjin për Zyrtarët Publik i cili parqet synimet për ta politizuar administratën dhe për ta vënë në shërbim të partisë në pushtet, Lëvizjes Vetëvendosje.
Qeveria ka paraparë që pas hyrjes në fuqi të këtij ligji të ju ndërpres kontratat e punës si aktemërime të përhershme të gjithë zyrtarëve publik për udhëheqës dhe të shpall konkurs me mandat 4 vjeçar, nga sa kanë qenë me akt emërime të përhershme”, tha Gruda.
Sipas tij, bëhet fjalë për mijëra zyrtarë që mbajnë këto pozita dhe mijëra familje që mbesin pa të ardhurat e tyre.
“Atyre do tu pushojnë marrëdhëniet e punës dhe të zëvendësohen me militantë partiak. Ky synim i Qeverisë për të shkëputur kontratat dhe shpallur konkurse në nivelin e mesë dhe të ulët drejtues të administratës, shkel të drejtat e njeriut, sigurinë juridike dhe parashikueshmërinë si parime të mishëruara në rendin kushtetues që garantohet nga Kushtetuta e Kosovës”, tha Gruda.
Ai tha se me ndryshimet e këtij ligji administrata do të politizohet dhe hapet mundësia e korrupsionit.
Sipas Grudës administrata do të bëhet e cenueshme nga ndërrimi i qeverive sepse do të jetë me mandat qeveritar.
Gruda tha se me këtë ndryshime shkelet edhe marrëveshja e MSA-së dhe një nga kriteret e anëtarësimit në BE. /teve1.info/
