“Publikimi i raporteve zyrtare mbi shitblerjen e energjisë elektrike gjatë vitit të kaluar ka konfirmuar atë që Partia Demokratike e Kosovës ka denoncuar vazhdimisht që nga fillimi i mandatit të qeverisë që tashmë është në detyrë, pra që në sektorin e energjisë janë kryer dhe po kryhen keqpërdorime të rënda që kërkojnë themelimin e një task-force nga Prokuroria Speciale me qëllim hetimin e këtyre krimeve dhe abuzimeve. Me shqetësim të thellë i kemi analizuar të dhënat që dëshmojnë kosto jashtëzakonisht të lartë për bartjen dhe blerjen e energjisë elektrike të realizuara me çmime marramendëse. Për vetëm gjashtë orë përmes një transaksioni të vetëm çmimi i transmetimit u rrit nga 2 në 798 euro për MWh, duke i kushtuar buxhetit të Kosovës prej mbi 1 milion euro në vetëm 6 orë”, tha Tahiri.
Në konferencë për media, Tahiri theksoi se shifrat çmimit të energjisë deri tani, janë rezultat i “ankandeve të kurdisura dhe përfitimeve marramendëse për kompanitë e lidhura me Qeverinë Kurti”.
“Partia Demokratike e Kosovës kërkon auditim të jashtëzakonshëm nga Zyra Kombëtare e Auditimit dhe nga auditorë të jashtëm për të analizuar mënyrën e zhvillimit të ankandeve dhe bazën ligjore, subjektet që kanë përfituar si dhe çmimet edhe shumat e paguara në këtë periudhë. Pezullimi i menjëhershëm i këtij vendimi për të dalë bizneset në treg të lirë deri në një periudhë të përshtatshme kur vërtetë në Kosovë do të krijohen kushtet që të kemi treg të lirë. Sepse tashmë nuk ka treg të lirë sepse është vetëm një ofertues i cili mund t’i furnizojë prodhuesit tanë vendor me energji elektrike. 1 qershori është një ditë, në rast se ky vendim nuk do të pezullohet është një ditë e zezë për ekonominë e vendit tonë, sepse nga ai moment prodhuesit tanë vendor do të shikojnë mundësitë e zhvendosjes së fabrikave të tyre jashtë Kosovës”,deklaroi ish-ministri i Drejtësisë.
Deputeti i Partisë Demokratike të Kosovës, Abelard Tahiri tha se tash e një kohë të gjatë e ka kërkuar vendimin e marrë nga ZRRE.
“Jemi duke e parë mundësinë që ta kemi sa më parë atë vendim të ZRRE-së, ta analizojmë dhe ta dërgojmë në gjykatë dhe të kërkojmë masë të përkohshme, pra mos implementimin e këtij vendimi deri në momentin që të krijohen kushtet që të ketë treg të lirë”, përfundoi Tahiri.
Ky vendim ka nxitur reagime e kundërshtime nga bizneset vendore. Komuniteti i biznesit dhe disa parti politike kanë kërkuar shtyrjen e kërkesës së ZRRE-së për treg të hapur energjetik.
Dhoma e Tregtisë dhe Industrisë Kosovë ka paralajmëruar se do të nisë betejën ligjore për të kundërshtuar vendimin e Zyrës së Rregullatorit të Energjisë, për liberalizimin e shpejtë të tregut të energjisë, pasi siç thuhet është marrë pa një analizë të mirëfilltë dhe pa asnjë konsultim me palët e interesit.
