Krasniqi përmes një video-mesazhi ka prezantuar “Kabinetin për Qeverisje të Mirë”, për të cilin tha se ky kabinet do të shpalos politikat alternative të qeverisjes që sipas tij sot i mungojnë Kosovës, shkruan Teve1.info
“Ditët e qeverisjes depresive duhet të marrin fund prandaj e shohim të domosdoshme që qytetarëve të ju ofrojmë perspektivë të re dhe një zotim të palëkundur për të ardhmen që duhet ta ndërtojmë se bashku për këtë vizion kaq të nevojshëm. PDK-ja po themelon kabinetin për qeverisje të mirë me të cilin do të shpalosë politikat alternative të qeverisjes që sot i mungojnë Kosovës e që i duhen asaj më shumë së kurrë”, tha ai.
Sipas tij, KQM-ja vjen si platformë politike që i del përballë keqqeverisjes dhe u del në krah qytetarëve.
“Përmes këtij kabineti ne do të shpalosim para qytetarëve, vizionin dhe modelin e qeverisjes së ardhshme që do të udhëhiqet nga PDK-ja. Për më shumë se dy vjet tashmë, PDK-ja ka qëndruar dinjitetshëm si udhëheqëse e opozitës përballë keqqeverisjes, paaftësisë dhe degradimit të sferës institucionale nga pushteti aktual”.
“… Kjo qeveri e ka humbur çdo momentum të mundshëm për të bërë diçka të mirë e domethënëse për Kosovën. Prandaj nga sot përpjekjeve tona i shtohet edhe kabineti për qeverisje të mirë i cili vjen si platformë politike që i del përballë keqqeverisjes dhe u del në krah qytetarëve”, foli ai.
Ai tregon se ky kabinet do të përbehet nga 15 departamente.
“Kabineti për qeverisje të mirë do të përbëhet nga 15 departamente. 1. Departamenti për Ekonomi Tregti dhe Ndërmarrësi, 2. Departamenti për Agjendë të Gjelbër; 3 Departamenti për Transformim Digjital dhe Inovacion; 4. Departamenti për Bujqësi; 5. Departamenti për Punë Publike dhe Investime Kapitale; 6. Departamenti për Financa; 7. Departamenti për Drejtësi; 8. Departamenti për Punë të Brendshme; 9. Departamenti për Mbrojtje dhe Siguri Kombëtare; 10. Departamenti për Arsim Shkencë dhe Kapital Njerëzor; 11. Departamenti për Kulturë, Sport dhe Turizëm; 12. Departamenti për Shëndetësi; 13. Departamenti për Përkujdesje Sociale; 14. Departamenti për Punë të Jashtme dhe Agjende Evropiane si dhe për 15. Departamenti për Mërgatë dhe Bashkëpunim Ndërshqiptar”, tha Krasniqi. /teve1.info/
