Kryetari i Partisë Demokratike të Kosovës, Bedri Hamza, ka refuzuar ftesën e kryeministrit në detyrë, Albin Kurti, për një takim lidhur me krijimin e institucioneve të reja.
Në letrën drejtuar Kurtit, Hamza rikujton takimin e mbajtur më 10 korrik 2026 dhe rikonfirmon qëndrimin e PDK-së.
“Ju falënderoj për ftesën për takim. Duke iu referuar takimit tonë të datës 10 korrik 2026 dhe qëndrimit publik të PDK-së, ju rikonfirmoj se, në rrethanat aktuale, qëndrimi ynë është që të vazhdojmë të qëndrojmë në opozitë”, shkroi Hamza.
Ai theksoi se pret që Lëvizja Vetëvendosje dhe partitë e tjera parlamentare të arrijnë një marrëveshje për formimin e institucioneve të reja.
“Presim që ju, në përputhje me përgjegjësitë që ju burojnë nga zgjedhjet e 7 qershorit 2026, së bashku me partitë e tjera të përfaqësuara në Kuvendin e Kosovës, të arrini marrëveshje për krijimin e institucioneve të reja të vendit”, thuhet në letrën e Hamzës.
