Kryetari i Partisë Demokratike të Kosovës, Memli Krasniqi, ka thënë se kanë kaluar mbi 8 muaj që ata janë bllokuar nga, siç ka theksuar ai, sjelljet arbitrare, megjithëse kanë fituar zgjedhjet.
Ai ka shtuar se koha e fjalëve ka marrë fund dhe se tani duhet të verifikohet shumica parlamentare që Vetëvendosje pretendon se ka arritur.
“Tani ju ftojmë që ta dëshmoni këtë përgjegjësi,” ka thënë Krasniqi.
Ndërkaq, kryetari i Lidhjes Demokratike të Kosovës, Lumir Abdixhiku, ka deklaruar se nuk sheh asgjë të qartë, veçanërisht pasi mandatari ka pranuar se nuk ka shumicën.
Ai ka theksuar se sot do të duhej të lindte thelbi i demokracisë: një mazhorancë politike.
“Në mungesë të njohjes bazike të arsyes pse jemi mbledhur sot, dëgjuam një përmbledhje pune fiktive, të njëjtën që kemi parë në legjislaturën e kaluar. Tani së paku do të duhej të tregohej dinjitet minimal. Mungesa e këtij dinjiteti ka sjellë 48 shkelje të paimagjinueshme të Kushtetutës së Kosovës. Kjo ka çuar në situatën ku një deputet është njëherësh kryeministër dhe ministër,” ka shtuar Abdixhiku.
