Objekte ikonike që i përkisnin Matthew Perry po dalin në ankand, duke emocionuar fansat e “Friends” dhe duke shërbyer për një kauzë të rëndësishme.
Ankandi do të mbahet më 5 qershor nga Heritage Auctions, ndërsa të ardhurat do të shkojnë për “Matthew Perry Foundation”, fondacioni i krijuar pas ndarjes nga jeta të aktorit për të luftuar stigmën ndaj varësisë dhe për të mbështetur shërimin.
Mes sendeve më të veçanta është skenari i episodit pilot të Friends (kur titullohej ende “Six of One”), i nënshkruar nga Perry dhe kolegët e tij si Jennifer Aniston, Courteney Cox dhe Lisa Kudrow.
Në shitje janë edhe 26 skenarë nga episodet më ikonike të serialit.
Nuk mungojnë as objekte unike si replika e famshme e derës së apartamentit të Monikës dhe Rachel, një tavolinë ping-pongu e personalizuar me temë Batman, si dhe një vepër origjinale nga Banksy, e vlerësuar mbi 800 mijë dollarë.
Matthew Perry, i njohur për rolin e Chandler Bing, u nda nga jeta në vitin 2023 në moshën 54-vjeçare.
Ai kishte folur shpesh për betejën e tij me varësinë dhe kishte theksuar rëndësinë e trajtimit me mirëkuptim dhe mbështetje.
Ky ankand nuk është thjesht një shitje sendesh të famshme, është një mënyrë për të vazhduar trashëgiminë e tij dhe për të ndihmuar të tjerët që përballen me të njëjtën betejë.
