Ambasada e Britanisë së Madhe në Kosovë ka bërë thirrje që të gjitha palët politike të respektojnë pavarësinë dhe vendimet e Gjykatës Kushtetuese, duke theksuar rëndësinë e saj për funksionimin e demokracisë në vend.
Në një reagim në Facebook, ambasada britanike thekson:
“Gjykata Kushtetuese e Kosovës ka procedura të përcaktuara mirë për shqyrtimet dhe vendimet e saj. Aftësia e Gjykatës për të funksionuar në mënyrë të pavarur është jetike për demokracinë e Kosovës. Kjo duhet të respektohet dhe promovohet nga të gjitha palët dhe vendimet e Gjykatës të respektohen dhe zbatohen.”
Ky reagim vjen pas vendimit të presidentes së Kosovës, Vjosa Osmani, për të tërhequr kërkesën për interpretim kushtetues në lidhje me seancën konstituive të Kuvendit të Kosovës.
Në një konferencë për media më 5 gusht, presidentja Osmani sqaroi se arsyeja e tërheqjes ishte emërimi i gjyqtarit serb, Radomir Llaban, si raportues për këtë çështje. Ajo theksoi se, sipas institucioneve të sigurisë, Llaban është konsideruar person i rrezikshëm për rendin kushtetues dhe sigurinë kombëtare, bazuar në raporte të vitit 2018, 2021 dhe 2024.
