Presidentja e Kosovës, Vjosa Osmani, ka zhvilluar biseda me liderë e partnerë ndërkombëtarë, pas sulmit terrorist kundër infrastrukturës kritike në vend më datën 29 nëntor në Ibër-Lepenc.
Përveç përfaqësuesve të shumë vendeve të tjera mike, përfshirë presidentë shtetesh, ajo bisedoi edhe me sekretarin e Jashtëm britanik, David Lammy dhe zëvendës sekretarin amerikan të Shtetit, Jim O’Brien, të cilët i ka falënderuar për reagimin dhe dënimin e sulmit ndaj infrastrukturës vitale në “Ibër-Lepenc”.
“Osmani i ka falënderuar për reagimin dhe dënimin e sulmit ndaj infrastrukturës vitale në Ibër-Lepenc. Diskutimet u fokusuan në sulmin e fundit terrorist ndaj infrastrukturës vitale të Kosovës dhe implikimet e tij për stabilitetin e Kosovës dhe më gjerë”, tha këshilltari politik i Osmanit, Bekim Kupina.
Shpërthimi ndodhi më 29 nëntor në fshatin Varragë të komunës së Zubin Potokut – komunë me shumicë serbe në veri të vendit.
Policia e Kosovës ka thënë se sulmi është kryer me lëndë shpërthyese deri në 20 kilogramë.
