Prada Group ka mbyllur zyrtarisht marrëveshjen për blerjen e shtëpisë ikonike të modës Versace, në një transaksion prej 1.25 miliardë euro , duke sjellë nën të njëjtin ombrellë stilin e guximshëm të Versaces me estetikën chic të Prada-s dhe freskinë rinore të Miu Miu.
Lorenzo Bertelli – trashëgimtari i perandorisë Prada dhe drejtori aktual i marketingut dhe qëndrueshmërisë në grup do të marrë drejtimin e Versace si kryetar ekzekutiv.
Ai ka lënë të kuptohet se nuk priten ndryshime të menjëhershme në menaxhment, por ka pranuar hapur se marka 47-vjeçare nuk ka arritur performancën që i takon, pavarësisht njohjes së saj të gjerë globale.
Prada beson se Versace ka “potencial të konsiderueshëm të pashfrytëzuar”.
Ky optimizëm lidhet me ringjalljen krijuese të markës nën drejtimin e stilistit të ri, Dario Vitale, i cili prezantoi koleksionin e tij të parë në Javën e Modës në Milano në shtator – një zhvillim që, sipas drejtuesve, nuk lidhet drejtpërdrejt me marrëveshjen e blerjes, raportoi The Independent.
Capri Holdings – pronare edhe e Michael Kors dhe Jimmy Choo e bleu Versace-n për 2 miliardë dollarë në vitin 2018. Në vitin 2024, Versace përbënte 20 përqind të të ardhurave të Capri Holdings nga 5.2 miliardë euro.
Sipas prezantimit të analistëve, tani Versace pritet të zërë 13 përqind të të ardhurave pro-forma të Prada Group, ndërsa Miu Miu do të përfaqësojë 22 përqind dhe marka kryesore Prada 64 përqind.
Vetë grupi Prada regjistroi një rritje prej 17 përqind të të ardhurave vitin e kaluar, duke arritur në 5.4 miliardë euro.
Një shtyllë kyçe e marrëveshjes është integrimi i Versace në rrjetin elit të prodhimit italian të Prada Group – një aset që kompania e konsideron thelbësor për suksesin e saj.
Për më tepër, akademia e trajnimit të Prada-s – një qendër e ngritur për të ruajtur mjeshtërinë tradicionale italiane ka formuar 570 artizanë gjatë 25 viteve, nga të cilët 70 përqind e 120 të trajnuarve të vitit të kaluar janë punësuar.
Këtë vit numri i të trajnuarve është rritur në 152.
