Dua Lipa dhe Callum Turner kanë bërë paraqitjen e tyre të parë zyrtare në tapetin e kuq si bashkëshortë, duke tërhequr vëmendjen në premierën e filmit të ri të aktorit, “One Night Only”, të mbajtur të hënën në New York.
Këngëtarja shqiptaro-britanike, 30 vjeçe, u shfaq me një fustan të personalizuar nga Ferragamo, të kuruar nga stilisti i saj Lorenzo Posocco.
Veshja karakterizohej nga një dekolte e thellë, detaj në formë shalli dhe një fund me teksturë elegante, ndërsa pamjen e kompletoi me vathë shumëngjyrësh me gurë të çmuar, aksesorë për veshët dhe një byzylyk të artë.
Në krah të saj, Callum Turner, 36 vjeç, zgjodhi një kostum blu të errët nga Louis Vuitton, të kombinuar me një këmishë në nuancë të verdhë të çelët dhe një kravatë me vija.
Çifti pozoi i buzëqeshur përpara fotografëve në tapetin e kuq të SVA Theater, duke shënuar daljen e tyre të parë publike pas martesës.
Turner është protagonisti i komedisë romantike “One Night Only”, ku luan përkrah Monica Barbaro.
Filmi, me regji të Will Gluck, sjell historinë e një nate të vetme në një realitet alternativ ku marrëdhëniet intime para martesës lejohen me ligj.
Premiera në kinema është planifikuar për 7 gusht.
Dalja e tyre vjen vetëm pak javë pasi çifti kurorëzoi dashurinë me martesë.
Dua Lipa dhe Callum Turner organizuan një ceremoni elegante në Villa Valguarnera, pranë Palermos në Sicili, më 6 qershor, pasi më herët kishin zyrtarizuar martesën civile në Marylebone Town Hall në Londër.
Më 20 qershor, fituesja e çmimit Grammy ndau me ndjekësit në Instagram fotografi nga ceremonia në Itali, ku u shfaq e veshur me një fustan nusërie të personalizuar Chanel Haute Couture, të zbukuruar me kristale dhe pupla.
Paraqitja e tyre në New York vjen vetëm një ditë pas përfundimit të Sunny Hill Festival në Prishtinë, ku Dua Lipa ishte një nga figurat kryesore të eventit dhe u rikthye në Kosovë për të mbështetur festivalin e themeluar nga familja e saj.
