Ministri në detyrë i Punëve të Brendshme, Xhelal Sveçla ka reaguar për gjetjen e trupit të pajetë të mërgimtarit, Rrahim Latifi në liqenin e Ujmanit, duke i shprehur ngushëllime familjes së tij.
Përmes një postimi në Facebook, Sveçla po ashtu ka shprehur mirënjohje të thellë edhe për të gjithë ata që u angazhuan me përkushtim në kërkimin e trupit të pajetë të Rrahim Latifit.
“Mirënjohje e thellë për të gjithë ata që u angazhuan me përkushtim në kërkimin e trupit të pajetë të qytetarit tonë Rrahim Latifi. Në këtë dhimbje të madhe qëndrojmë pranë familjes Latifi që humbi më të dashurin e tyre. U shpreh ngushëllimet e mia më të sinqerta”, ka shkruar Sveçla.
Trupi i pajetë i 33-vjeçarit, Rrahim Latifi, i cili të dielën kishte kërcyer nga ura në Liqenin e Ujmanit dhe më nuk kishte dalë nga uji, u gjet të martën pasdite.
Në dy ditë të kërkimeve intensive nga Policia dhe Shoqata e Kërkim-Shpëtimit, nuk pati rezultat, teksa sot në mëngjes në këtë operacion u përfshi edhe FSK-ja.
