Ishte vetëm 9 vjeç kur mbeti i plagosur nga forcat serbe.
Për 27 vite, trupi i tij mbeti i zhdukur e eshtrat e tij u gjendën vetëm para disa ditësh në Suhodoll të Mitrovicës.
Rivarrimi i Sinan Dautit u bë këtë të shtunë në lagjen “Bregaj” të Prekazit.
Një fjalë rasti në emër të familjes e tha Anton Dauti.
Ndërsa drejtori i shkollës ku vijonte mësimin Sinani, tregoi disa nga momentet e fundit pas plagosjes së 9-vjeçarit.
“Gjyshja e tij Ajshja e merr Sinanin dhe e dërgon në spitalin e Skenderajt ku mjekimin e plagëve të tij e bën dr Bedri Shala, nga aty Sinani dërgohet me autoambulancë në Mitrovicë. Plagëve të marra Sinani nuk mundi t’u bëjë ballë”, tregoi drejtori i shkollës, Ajet Ajeti.
Të pranishëm në këtë ceremoni ishin edhe përfaqësues institucionesh.
“Sinani më në fund po prehet në paqe, në një vend që do ta vizitojnë jo vetëm të afërmit e tij, familja, por të gjithë shqiptarët nga të gjitha anët”, tha u.d. e presidentes, Albulena Haxhiu.
“Në atë moshë Sinani do të duhej të ishte në shkollë, jo në listat e të zhdukurve për 27 vite. Do të mbante libra në duar, jo plumba në barkun e tij”, tha ministri Andin Hoti.
Ndërsa Kushtrim Gara nga Komisioni Qeveritar për persona të zhdukur, tha se pesha e dhimbjes nuk mund të matet me asnjë njësi.
“Janë jetë të ndërprera, janë fëmijëri të shuara janë kristale që mbajnë brenda tyre dhimbjen më të pastër njerëzore”, tha Gara.
Ceremonia e rivarrimit u organizua sipas kërkesës së familjes, me përkrahje të Komisionit Qeveritar për Persona të Zhdukur dhe Komunës së Skenderajt.
