Mëngjesin e zbardhën në Liqenin e Batllavës.
Të pajisur me mjete, qëndruan me orë në kërkim të trupit të 25-vjeçarit të zhdukur.
Ekipet e shpëtimit të Forcës së Sigurisë së Kosovës, të mërkurën vazhduan operacionin e nisur një ditë më parë.
I riu dyshohet që të martën u hodh nga varka për të notuar, por i njëjti nuk doli më në sipërfaqe.
Pas rreth 24 orësh kërkimi, trupi i 25-vjeçarit u lokalizua.
Me të ardhur në breg trupi i viktimës, të parit që iu lejua ta shoh ishte babai i tij.
Të paktë nuk ishin as familjarë të tjerë të cilët u panë në vendngjarje.
Detaje rreth rastit dhanë nga Policia e Kosovës.
“Sot pas përpjekjeve nga ekipi i kërkimit dhe shpëtimit, personi është arritur të nxirret nga uji. Ekipi mjekësor në vendin e ngjarjes, ka konstatuar se i njëjti është pa shenja jete. Në koordinim me prokurorin e shtetit, po ndërmerren veprimet e nevojshme procedurale dhe hetimore lidhur me rastin”, thuhet në njoftimin e Policisë së Kosovës.
Ndërsa nga FSK u bë e ditur që trupi i pajetë i është dorëzuar Mjekësisë Ligjore për obduksion.
“Pas dy ditë kërkimesh ekipet e kërkim shpëtimit të Forcës së Sigurisë së Kosovës, kanë arritur të gjejnë trupin e pajetë të personit të zhdukur dje në Liqenin e Batllavës me inicialet L.R. Pas evakuimit të viktimës trupi i pajetë i është dorëzuar Mjekësisë Ligjore dhe Policisë së Kosovës për procedurat e mëtejme”, ka njoftuar Forcat e Sigurisë së Kosovës.
Në pjesën ku ndodhi e gjithë ngjarja, thellësia e ujit dyshohet të jetë rreth 10 metra.
Pas konfirmimit të vdekjes të 25-vjeçarit, kryetari i Komunës së Podujevës, Shpejtim Bulliqi u shprehu ngushëllime familjarëve.
