Lëvizja Vetëvendosje (VV), Lidhja Demokratike e Kosovës (LDK), Partia Demokratike e Kosovës (PDK) dhe Aleanca për Ardhmërinë e Kosovës (AAK) kanë vendosur të garojnë së bashku në zgjedhjet lokale në komunën e Graçanicës.
Bashkimi i tyre do të bëhet përmes iniciativës “Aleanca Shqiptare”, njoftoi nënkryetari i komunës dhe kandidat për kryetar, Leutrim Ajeti.
“Me shumë kënaqësi ju njoftoj që bindjet tona partiake për këto zgjedhje kemi vendosur t’i lëmë anash dhe të bashkohemi të gjithë shqiptarët në një iniciativë që quhet Aleanca Shqiptare,” shkroi Ajeti në Facebook.
Ai bëri të ditur se lista për Asamblenë Komunale do të përbëhet nga kandidatët e partive dhe aktivistë me profile të ndryshme, ndërsa nga dhjetë kandidatë, katër do të jenë gra. Përveç listës për Asamblenë Komunale, Ajeti kandidohet edhe për kryetar të komunës.
“Me kënaqësi të madhe e përgjegjësi të lartë ndihem skajshmërisht i privilegjuar që emri im është i përzgjedhur si kandidat për kryetar të komunës, i listës së përbashkët shqiptare,” shtoi ai.
Ajeti njoftoi gjithashtu se në ditët në vijim do të prezantohet edhe programi qeverisës katërvjeçar, i cili do të përfshijë investime në të gjitha pjesët e Graçanicës, pa dallim etnie apo feje, me qëllim që Aleanca Shqiptare t’ju shërbejë të gjithëve.
