Tre yjet aktualisht më të mëdhenj të futbollit, Lionel Messi, Cristiano Ronaldo e Kylian Mbappe, kanë shënuar gola në ndeshjen miqësore që u luajt të enjten mbrëma në Riad të Arabisë Saudite.
Janë takuar Paris Saint-Germaini dhe ekipi i kombinuar i yjeve të skuadrave arabe Al Hilal e Al-Nassr. Fitore me rezultatin 5:4 ka shënuar kampioni i Francës, PSG.
Që në minutën e tretë, Lionel Messi shënoi për 1:0. Ai realizoi me asistim të Neymarit. Shifrat në 1:1 i barazoi Cristiano Ronaldo në minutën e 34-t. Ronaldo tashmë luan për skuadrën Al-Nassr, ndërsa kjo ishte paraqitja e parë e portugezit në Arabi. Për 2:1 në të mirë të Parisit shënoi Marquinhos në minutën e 43-të. Ai shënoi me asistim të Mbappes. Por sërish në skenë doli Ronaldo që barazoi rezultatin në 2:2 në minutat shtesë të pjesës së parë. Katër gola u shënuan në pjesën e parë, por spektakli ishte larg përfundimit.
Mbappe në minutën e 53-të asistoi për Sergio Ramosin që për herë të tretë kaloi Parisin në epërsi. Pak më vonë, në minutën e 56-të, Jang Hyun-sso shënoi për 3:3. Pas një ore lojë ishte radha e Mbappes që të realizonte.
Ai konkretizoi nga pika e bardhë për 4:3. Për 5:3 në të mirë të Parisit shënoi Hugo Ekitike në minutën e 78-të. Talisca realizoi për arabët në minutën e 94-t, për rezultatin përfundimar, 5:4. PSG-ja prej minutës së 39-të luajti me një lojtar më pak në fushë.
Me karton të kuq u përjashtua Juan Bernat. Ndeshja është pritur me shumë interes për faktin se u përballen dy lojtarët më të mëdhenj të kohës, Messi e Ronaldo. Me gjasë kjo është njëra prej përballjeve të fundit të tyre, nëse jo e fundit.
