Paris Jackson ka fituar një përballje të rëndësishme ligjore lidhur me menaxhimin e pasurisë së babait të saj, Michael Jackson, duke siguruar një vendim në favor të saj nga një gjykatë në Los Angeles.
Gjykata urdhëroi që rreth 625 mijë dollarë, të shpërndara si pagesa shtesë për kompani të jashtme ligjore nga administratorët e pasurisë John Branca dhe John McClain, të rikthehen në fondin e trashëgimisë së këngëtarit legjendar.
Vendimi erdhi pasi Paris kundërshtoi këto pagesa, duke argumentuar se ato nuk ishin të justifikuara.
Gjykatësi pranoi kërkesën e saj dhe i dha gjithashtu mundësinë të kërkojë rimbursimin e kostove ligjore dhe tarifave të avokatëve.
Përfaqësuesit ligjorë të pasurisë së Michael Jackson reaguan duke deklaruar se, edhe pse nuk pajtohen me vendimin, do ta zbatojnë atë.
Ata sqaruan se fondet nuk ishin përfitime personale për ekzekutorët, por pagesa për shërbime juridike të jashtme.
Ndërkohë, ekipi i Paris Jackson e cilësoi vendimin si një hap të rëndësishëm drejt transparencës financiare, duke theksuar se ajo prej kohësh kërkon kontroll më të madh mbi mënyrën se si administrohet pasuria e artistit.
Paris dhe vëllezërit e saj, Prince dhe Bigi Jackson, janë trashëgimtarët kryesorë të pasurisë së Michael Jackson.
Gjatë viteve, ajo ka ngritur vazhdimisht shqetësime për mënyrën e menaxhimit të financave, duke akuzuar administratorët për shpërdorim dhe përfitime të tepruara pretendime që janë mohuar nga pala tjetër.
Në një prej dokumenteve të dorëzuara në gjykatë, Paris pretendon se vetëm në vitin 2021 administratorët kanë përfituar mbi 10 milionë dollarë kompensime, ndërsa familja ka marrë shumë më pak nga fitimet e pasurisë.
Kur Michael Jackson ndërroi jetë në vitin 2009, pasuria e tij thuhej se ishte e ngarkuar me borxhe që kapnin shifrën e mbi 500 milionë dollarëve.
Megjithatë, administratorët pretendojnë se me kalimin e viteve ajo është kthyer në një nga markat më fitimprurëse në botën e muzikës dhe argëtimit.
