Policia e Kosovës e ka parandaluar një rast të kontrabandës në veri të Kosovës, në orët e para të mëngjesit të së premtes, raporton teve1.info
Sipas komunikatës së Policisë së Kosovës, në brezin kufitar në Jarinje të Poshtme është vërejtur një veturë me rimorkio e dyshimtë e cila është ndaluar në fshatin Bistricë si dhe pesë persona të dyshuar se kanë hyrë ilegalisht në Kosovë.
Sipas Policisë, rasti është duke u hetuar.
“Me qëllim të realizimit të detyrave të saj, Njësia për Ndërhyrje të Shpejtë (NjNSh) e Drejtorisë Rajonale të Kufirit-Veriu, ka shtuar aktivitetet në parandalim të veprimtarive penale në përgjithësi dhe kontrabandës në veçanti.
Më 24 shkurt 2023 rreth orës 03:00, njësitë policore të NjNSh-së, derisa ishin në vëzhgim dhe kontrollim të terrenin në brezin kufitar – Jarinje e Poshtme, kanë vërejtur lëvizje (drita të automjetit) të dyshimta në atë zonë.
Policia menjëherë ka organizuar një plan taktik me qëllim të ndaljes së atij automjeti. Kështu, në malet e fshatit Bistricë, ka arritur të ndalojë pesë persona të cilët dyshohet se kishin hyrë në territorin e vendit përmes rrugëve ilegale. Ata janë hasur duke tentuar të fusin në vendin tonë një automjet, të ngarkuar në një rimorkio, duke i ikur obligimeve doganore”, thuhet në njoftimin e Policisë.
