Shkruan: Artijon Aliu
Dashuria dhe pasioni për futbollin shpesh kalojnë të gjitha kufijtë dhe imagjinata e atyre që e duan këtë sport, i shtyn ata që të bëjnë gjëra tepër interesante.
Si fëmijë, tifozët e futbollit kanë dëshirë të kenë fanellën e një lojtari të preferuar, apo të skuadrës së tyre të zemrës. Kjo ndodh shpesh. Viteve të fundit kemi parë në çdo moment fanellën e Ronaldo e Messi. Gjë që është e zakonshme.
Megjithatë ka edhe prej atyre që këtë e çojnë në një nivel tjetër, duke koleksionuar fanella të skuadrës së tyre ndër vite, madje edhe ato të stërvitjeve. Të tillë kemi edhe në Kosovë. Gëzim Halili, numëron rreth 200 të tilla në sirtarin e tij dhe i ruan me mjaft shumë dashuri.
Gjilanasi ka një llojllojshmëri të madhë të trikove në dhomën e tij, disa prej tyre që nuk ekzistojnë as në tregun e shitjes.
Ai ka koleksionuar edhe një numër të madh të fanellave nga skuadra e tij e zemrës, Drita, që nga themelimi i klubit e deri në ditën e shpalljes kampion.
