Gjykata Themelore në Ferizaj, ka aprovuar kërkesën e Prokurorisë Themelore të Ferizajt, për caktimin e masës së paraburgimit kundër të pandehurit F.G., për shkak të dyshimit se ka kontraktuar shuma jo proporcionale të pasurisë në këmbim të shërbimit për persona tjerë.
I dyshuari ka shfrytëzuar gjendjen e vështirë financiare të personit, në atë mënyrë që i dëmtuari E.A., për shkak të vështirësive financiare si pasojë e pandemisë nga COVID-19, është detyruar që të kërkoj para fajde nga i pandehuri, raporton teve1.info.
Sipas komunikatës, thuhet që fillimisht ka marrë 4000 euro me fajde 20% në muaj, mirëpo me pamundësi për t’i paguar shumat e fajdeve është detyruar të merr edhe 3 herë nga 2000 dhe një herë 6000.
“Gjithsej gjashtëmbëdhjetë mijë euro, për të cilat ka paguar në emër të fajdeve nga tremijë e dyqind euro në muaj, kështu që brenda një viti ka paguar shumën prej katër dhjetë mijë euro vetëm për fajde, kurse borxhin prej gjashtëmbëdhjetë mijë euro ka mbetur pa e paguar”, thuhet në komunikatë.
Gjyqtari, kërkesën e prokurorit të shtetit për caktimin e masës së paraburgimit kundër të pandehurit e ka aprovuar si të bazuar dhe të njëjtit i është caktuar masa e paraburgimit në kohëzgjatje prej një muaj.
“Me këtë rast palët njoftohen se ankesa kundër këtij aktvendimi nuk e shtynë ekzekutimin e tij”.
