Departamenti Special ka caktuar masën e paraburgimit ndaj të pandehurve B.M. dhe Q.M. për shkak të kryerjes së gjashtë veprave penale.
Gjykata Themelore në Prishtinë, ka caktuar masën e paraburgimit nga një muaj të dyshuarave B,M dhe Q.M.
Sipas Prokurorisë i pandehurit B.M., dyshohet se ka kryer veprat penale Fajde, Shpëlarja e parave nga neni 302 të KPRK-së lidhur me nenin 56 para 1 të ligjit nr.05/L-096 për Parandalimin e Parave dhe Luftimin e Financimit të Terrorizmit, Falsifikim i Dokumenteve, Mashtrimi dhe veprën penale Kanosje ndërsa i pandehuri Q.M. për shkak të dyshimit të bazuar se ka kryer veprën penale Shpëlarja e parave nga neni 302 të Kodit Penal ët Republikës së Kosovës lidhur me nenin 56 par. 1 të ligjit nr.05/L-096 për Parandalimin e Parave dhe Luftimin e Financimit të Terrorizmit.
Gjyqtari i procedurës paraprake, pas seancës dëgjimore vlerësoj se janë përmbushur kushtet ligjore për caktimin e masës së paraburgimit për të pandehurit B.M. dhe Q.M., pasi ekziston dyshimi i bazuar se të njëjtit kanë kryer veprat penale të lartëcekura.
“Gjykata vlerësoj se pesha e veprave penale është e natyrës së rëndë dhe komplekse, andaj caktimi i masës së paraburgimit është masë e domosdoshme në këtë rast penal dhe se çdo masë tjetër do të ishte e pamjaftueshme për zbatimin e suksesshëm të procedurës penale”, thuhet nga Gjykata Themelore në Prishtinë.
Gjykata konstatoj se ekziston dyshimi i bazuar se të pandehurit B.M. dhe Q.M. nëse gjenden në liri, mund të arratisen dhe mund të jenë të pa arritshëm për fazat tjera të procedurës penale, gjithashtu nëse të pandehurit lihen në liri paraqesin rrezik real se të njëjtit mund të asgjësojnë, fshehin, ndryshojnë ose falsifikojnë provat e veprave penale, ose të pengojnë rrjedhën normale të hetimeve, e veçmas mund të ndikojnë në prova dhe në dëshmitarë.
Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë.
