Edicioni i pestë i panairit ndërkombëtar të turizmit u hap me valle tradicionale.
E kjo shënoi nisjen e një organizimi që tashmë po bëhet çdo vit në Prishtinë dhe po mbledh përfaqësues nga vende të ndryshme.
Për rëndësinë e këtij panairi dhe bashkëpunimet në këtë sektor, foli kryetari i Unionit të Turizmit.
“Themelimi i industrisë së turizmit shënon një hap të rëndësishëm në industrinë e turizmit të Kosovës. Unioni i turizmit të Kosovës shpreh gatishmërinë e plotë për bashkëpunim dhe partneritet të ngushtë me këtë ministri”, tha kryetari Baki Hoti.
Ndërkaq, nga Ministria e Kulturës dhe Turizmit, u theksua roli i panairit në prezantimin e shteteve dhe krijimin e lidhjeve të reja.
“Ky panair nuk është vetëm një hapësirë ekspozimi, por një platformë ku vendet prezantojnë identitetin e tyre, pasuri kulturore dhe potencialin turistik duke ndërtuar ura bashkëpunimi dhe partneritete të qendrueshme”, tha këshilltari i lartë politik në Ministrinë e Kulturës dhe Turizmit, Muhjedin Nushi.
Nga komuna e Prishtinës e cilësuan kryeqytetin si një vend me potencial për zhvillim turistik.
“Ky panair i cili tash e sa vite organizohet nën patronatin e komunës së Prishtinës është shndërruar në një platformë të rëndësishme për bashkpunim, rrjetizim, dhe promovim të turizmit si në nivel rajonal ashtu edhe në nivel ndërkombëtar”, tha drejtoresha e Turizmit në Komunën e Prishtinës, Rezarta Aliu.
E përfaqësues nga Mali i Zi theksuan rëndësinë e pjesëmarrjes dhe promovimit të ofertave turistike në Kosovë.
“Nuk është hera e parë që marr pjesë këtu në Kosovë, pasi që vi për të treguar atë sigurinë, për të treguar atë se cfarë ofron Ulqini dhe gjithmonë kemi ndryshime por për tju siguruar që jeni gjithmonë të mirëseardhur për tju dhënë garanci dhe për gjitha aspektet cka ofron kjo zonë turistike”, tha ministri për të Drejtat e Njeriut dhe Pakicave nga Mali i Zi, Fatmir Xhekaj.
Ndërsa nga Shqipëria, u hodh ideja për organizimin e një panairi të përbashkët gjithëkombëtar.
“Ne jemi vende të vogla dhe prap me panairet tona nuk e arrimë atë qellimin tonë që te jenë një platformë të rëndësishme, por unë i qëndroj mendimit që të bëjmë një panair mbarëkombëtarë- shqiptarë me qëllim që të promovojmë identitetin tonë shqiptar”, tha presidenti i Unionit të Turizmit të Shqipërisë, Rrahman Kasa.
E drejtori i agjencionit “EuroKoha”, Remzi Ejupi u shpreh që Kosova nuk duhet vetëm që të jap turistë por të njëjtit t’i ketë edhe këtu.
“Është mirë që bëhen panaire të tilla edhe pse Kosova mendoj që akoma nuk është e gatshme që të ofrojë turizëm në atë të cilën e ka dhe e gëzon mendoj që duhet hala punë për të bërë sidomos në turizmin dimëror dhe turizmin malor”.
Në këtë panair pati edhe vizitorë të huaj, të cilët për herë të parë po njihen me atë që ofron Kosova.
“Ne jemi këtu për të parë se çfarë ka në Kosovë, që të kthehemi në Rumani dhe të flasim për ato që pamë këtu. Gjithashtu, unë kam ardhur këtu me kolegët e mi, ata janë prodhues, prodhues lokalë nga Rumania, dhe ju mund të shihni se çfarë bëjnë ata në Rumani mbase në të ardhmen shumë njerëz nga Rumania do të vijnë këtu në Kosovë dhe njerëzit nga Kosova mund të shkojnë në Rumani për të vizituar gjithashtu vendin tonë”, tha Nicoleta Busa nga Rumania.
Në hapësirat e panairit vizitorë të shumtë patën mundësi të shohin nga afër se çfarë ofron secili vend.
Ndërsa pati edhe takime mes përfaqësuesve të industrisë.
